নিয়মীয়া বাৰ্তা, ১৫ মাৰ্চঃ অসম ৰাজ্যিক বিদ্যুৎ পৰিষদ স্প’টছ ক্লাব আৰু দুলীয়াজানৰ অইল ইণ্ডিয়া ফুটবল ক্লাবে ৬৭সংখ্যক ভাৰতৰত্ন লোকপ্রিয় গোপীনাথ বৰদলৈ ট্রফী ফুটবল প্রতিযোগিতাত বৃহৎ জয় সাব্যস্ত কৰিছে৷ গুৱাহাটীৰ জজ খেলপথাৰত আজি অনুষ্ঠিত এখন মেচত বিদ্যুৎ পৰিষদে ইলেভেন ষ্টাৰক ৪–০ গ’লত পৰাস্ত কৰিবলৈ সক্ষম হয়৷ বিজয়ী দলটোৰ হৈ মনজিৎ ৰাভাই ৫৬, ৫৮, ৬০ আৰু ৭০ মিনিটত চাৰিওটা গ’ল কৰে৷
ইফালে, মৰিগাঁৱত অনুষ্ঠিত প্রতিযোগিতাৰ আনখন মেচত অইল ইণ্ডিয়াই মৰিগাঁও এফ চিক ৫–০ গ’লত হৰুৱায়৷ অইলৰ হৈ ১৪ মিনিটত তুল্য দাস, ১৬ মিনিটত মিণ্টু বড়ো, ৩০ মিনিটত আক্রং নার্জাৰী, ৪৩ মিনিটত তুল্য দাসে গ’ল কৰাৰ বিপৰীতে ৫৮ মিনিটত জি বসুমতাৰীয়ে আত্মঘাতী গ’ল কৰে৷ কাইলৈ গুৱাহাটীত ইলেভেন ষ্টাৰ ক্লাব আৰু গুৱাহাটী টাউন ক্লাবৰ মাজত মেচ অনুষ্ঠিত হ’ব৷ একেদৰে মৰিগাঁৱত বডৌছা স্প’টছ ক্লাবে মৰিগাঁও এফ চিৰ মুখামুখি হ’ব৷