ভাৰত আৰু ইংলেণ্ডৰ মাজত চলি থকা ৩খন মেচৰ এদিনীয়া শৃংখলাৰ দ্বিতীয়খন মেচ বৃহস্পতিবাৰে (১৬ জুলাই) কাৰ্ডিফৰ ছ’ফিয়া গাৰ্ডেন্সত অনুষ্ঠিত হয়। এই মেচত ইংলেণ্ডে ৪ উইকেটত জয় লাভ কৰি শৃংখলাটো ১-১ সমতালৈ আনে।
২৩৪ ৰানৰ লক্ষ্য খেদি নামি ইংলেণ্ডে ৪৪.১ অভাৰত ৬ উইকেট হেৰুৱাই লক্ষ্যত উপনীত হয়। দলটোৰ জয়ত জো ৰুটে ১৩৩টা বলত ৯টা চাৰিৰে ৯৯ ৰানৰ অসাধাৰণ ইনিংছ খেলে। এতিয়া শৃংখলাৰ নিৰ্ণায়ক তৃতীয়খন মেচ ১৯ জুলাইত লণ্ডনৰ লৰ্ডছত অনুষ্ঠিত হ’ব।
লক্ষ্য খেদি নামি ইংলেণ্ডৰ আৰম্ভণি অত্যন্ত দুৰ্বল আছিল। ইনিংছৰ প্ৰথমটো বলতেই যশপ্ৰীত বুমৰাহে বেন ডাকেটক শূন্য ৰানত আউট কৰে।
ইয়াৰ পিছত জেকব বেথেল (৪) আৰু অধিনায়ক হেৰী ব্ৰুক (১৬)ও পেভিলিয়নলৈ উভতি যায়। বেথেলক প্ৰসিদ্ধ কৃষ্ণই আৰু ব্ৰুকক গুৰনুৰ ব্ৰাৰে আউট কৰে। সেই সময়ত ইংলেণ্ডৰ স্ক’ৰ আছিল ৫৩/৩।
চতুৰ্থ উইকেটত ছেম কৰন (২৬) আৰু জো ৰুটে ৪১ ৰানৰ পাৰ্টনাৰশ্বিপ গঢ়ে। এই যুটি ভংগ কৰে শিৱম ডুবেই। ডুবেৰ বলত ঈশান কিশনে ছেম কৰনৰ কেচ লয়। উল্লেখযোগ্য যে ইংলেণ্ডৰ প্ৰথম চাৰিটা উইকেটৰ প্ৰতিটো ক্ষেত্ৰতেই উইকেটৰ পিছফালে ঈশান কিশনে কেচ ধৰে। ইয়াৰ পিছত জছ বাটলাৰ ১৭ ৰানত অক্ষৰ পেটেলৰ বলত ব’ল্ড হয়।
এফালে উইকেট পৰি থাকিলেও আনফালে জো ৰুটে ইনিংছ ধৰি ৰাখে। তেওঁ উইল জেকছৰ সৈতে ষষ্ঠ উইকেটত ৭২ ৰানৰ গুৰুত্বপূৰ্ণ পাৰ্টনাৰশ্বিপ গঢ়ে। উইল জেকছে ৩০ ৰান কৰি গুৰনুৰ ব্ৰাৰৰ বলত আউট হয়। শেষত জো ৰুট আৰু গাছ এটকিনছন (অপৰাজিত ২৩)য়ে ইংলেণ্ডক জয়ৰ দুৱাৰলৈ লৈ যায়।
টছত পৰাজিত হৈ প্ৰথমে বেটিং কৰা ভাৰতে ভাল আৰম্ভণি কৰে। ৰোহিত শৰ্মা আৰু শুভমন গিলে প্ৰথম উইকেটত ৪৪ ৰান যোগ কৰে। গাছ এটকিনছনৰ বলত ডাঙৰ শ্বট খেলিবলৈ গৈ শুভমন গিলে ৩০টা বলত ৬টা চাৰিৰে ৩১ ৰান কৰি আউট হয়।
ইয়াৰ পিছত অধিনায়ক ৰোহিত শৰ্মাও ডাঙৰ ইনিংছ খেলিব নোৱাৰিলে। তেওঁ ৪৭টা বলত ২৬ ৰান কৰি উইল জেকছৰ বলত জছ বাটলাৰৰ হাতত কেচ দিয়ে।
কেএল ৰাহুলৰ ঠাইত সুযোগ পোৱা ঈশান কিশনে মাত্ৰ ১ ৰান কৰি ছেম কৰনৰ বলত কেচ আউট হয়। সেই সময়ত ভাৰতৰ স্ক’ৰ আছিল ১১১/৩।
তাৰ পিছত বিৰাট কোহলিয়ে ৫০টা বলত অৰ্ধশতক সম্পূৰ্ণ কৰে। ইংলেণ্ডৰ বিৰুদ্ধে এদিনীয়াত এয়া তেওঁৰ ১৪সংখ্যক ৫০ৰ অধিক স্ক’ৰ। এই কৃতিত্বৰে তেওঁ ভিভিয়ান ৰিচাৰ্ডছৰ সমান হয়। এই তালিকাত কেৱল কুমাৰ ছাংগাকাৰাই (১৫) তেওঁতকৈ আগত আছে।
অৱশ্যে ৬৫ ৰানত জোফ্ৰা আৰ্চাৰৰ বলত কোহলি আউট হয়। ইয়াৰ পিছত ৱাশ্বিংটন সুন্দৰ মাত্ৰ ২ ৰান কৰি ছাকিব মাহমুদৰ বলত আউট হয়। সেই সময়ত ভাৰতৰ স্ক’ৰ আছিল ১৮১/৫।
ইয়াৰ পিছত জোফ্ৰা আৰ্চাৰে একেৰাহে দুটা বলত অক্ষৰ পেটেল (১) আৰু শিৱম ডুবে (০)ক আউট কৰি ভাৰতক বিপদত পেলায়।
গুৰনুৰ ব্ৰাৰ ৭ ৰানত ছাকিব মাহমুদৰ বলত আউট হয়। আনফালে শ্ৰেয়াছ আয়াৰে ধৈৰ্য্যৰে বেটিং কৰি ৬৬ ৰান সংগ্ৰহ কৰে যদিও ৪৪তম অভাৰত গাছ এটকিনছনৰ বলত জছ বাটলাৰৰ হাতত কেচ দিয়ে। একেটা অভাৰতে প্ৰসিদ্ধ কৃষ্ণও শূন্য ৰানত আউট হয়। শেষত যশপ্ৰীত বুমৰাহ ২০ ৰানত অপৰাজিত থাকে আৰু ভাৰতে ৫০ অভাৰত ২৩৩ ৰান সংগ্ৰহ কৰে।
ইংলেণ্ডৰ হৈ জোফ্ৰা আৰ্চাৰ আৰু গাছ এটকিনছনে ৩টাকৈ উইকেট দখল কৰে। ছাকিব মাহমুদে ২টা আৰু উইল জেকছ আৰু ছেম কৰনে ১টাকৈ উইকেট লাভ কৰে।
ইংলেণ্ড এই জয়েৰে ৩খন মেচৰ এদিনীয়া শৃংখলাটো এতিয়া ১-১ সমতাত উপনীত হৈছে। শৃংখলাৰ বিজয়ী নিৰ্ধাৰণ হ’ব ১৯ জুলাইত লণ্ডনৰ লৰ্ডছত অনুষ্ঠিত হ’বলগীয়া তৃতীয় তথা অন্তিম মেচত।
ডিজিটেল ডেস্ক, ১৭ জুলাই