ডিজিটেল ডেস্ক, ৪ জুলাই : বিশ্ব চেম্পিয়ন আৰ্জেণ্টিনাই ফিফা বিশ্বকাপৰ ইতিহাসৰ অন্যতম স্মৰণীয় বিপদৰ পৰা অতি কষ্টেৰে ৰক্ষা পাই প্ৰথমবাৰৰ বাবে বিশ্বকাপত অংশগ্ৰহণ কৰা কাবো ভাৰ্ডেক অতিৰিক্ত সময়ত ৩-২ গ’লত পৰাস্ত কৰি মিয়ামিৰ আলোকোজ্জ্বল পৰিৱেশত অনুষ্ঠিত ৰোমাঞ্চকৰ নকআউট মেচখনত জয়লাভ কৰে।
ফুটবলপ্ৰেমীয়ে দীৰ্ঘদিনলৈ মনত ৰাখিবলগীয়া এই মেচখনত ‘ব্লু শ্বাৰ্কছ’ নামেৰে পৰিচিত কাবো ভাৰ্ডেই দুবাৰ পিছ পৰাৰ পিছতো সমতা ঘূৰাই আনিছিল। আৰ্জেণ্টিনাৰ কৌশলী আৰু নিখুঁত খেলৰ বিপৰীতে কাবো ভাৰ্ডেই অসাধাৰণ ব্যক্তিগত নৈপুণ্যৰে মেচখনক নাটকীয় কৰি তোলে। ২৯ মিনিটত লিঅ’নেল মেছিয়ে স্বাভাৱিক দক্ষতাৰে প্ৰথম গ’ল কৰি আৰ্জেণ্টিনাক অগ্ৰগতি দিয়ে। কিন্তু দ্বিতীয়াৰ্ধত ডেৰয় ডুৱাৰ্টেই চতুৰতাৰে গ’ল কৰি বিশ্ব চেম্পিয়ন দলটোক স্তম্ভিত কৰাৰ লগতে মেচখন অতিৰিক্ত সময়লৈ লৈ যায়।
অতিৰিক্ত সময় আৰম্ভ হোৱাৰ লগে লগে নাটকীয়তা আৰু বাঢ়ি যায়। ৯৩ মিনিটত লাউটাৰো মাৰ্টিনেজে কাবো ভাৰ্ডেৰ ৰক্ষণভাগৰ সাময়িক ভুলৰ সুযোগ লৈ গ’ল কৰি আৰ্জেণ্টিনাক পুনৰ আগুৱাই নিয়ে। কিন্তু কাবো ভাৰ্ডেই হাৰ নামানিলে। ১০৪ মিনিটত কাবো ভাৰ্ডেৰ লোপেছ কাব্ৰালে এক শক্তিশালী আৰু বক্ৰ গতিপথেৰে শ্বট মাৰে, যিটো আৰ্জেণ্টিনাৰ গ’লৰক্ষক এমি মাৰ্টিনেজে প্ৰতিহত কৰিব নোৱাৰিলে। এই অসাধাৰণ গ’লটো বহু বছৰ ধৰি বিশ্বকাপৰ অন্যতম শ্ৰেষ্ঠ গ’ল হিচাপে স্মৰণীয় হৈ থাকিব।
অৱশেষত খেলখনৰ ১১১ মিনিটত মেছিয়ে নিখুঁতভাৱে কৰ্ণাৰ কিক আগবঢ়ায় আৰু ক্ৰিষ্টিয়ান ৰোমেৰোৱে শক্তিশালী হেডাৰেৰে বল গলপোষ্টলৈ প্ৰেৰণ কৰি আৰ্জেণ্টিনাৰ জয় নিশ্চিত কৰে। ইয়াৰ পিছতো কোবা ভাৰ্ডেই শেষ মুহূৰ্তলৈকে আক্ৰমণ অব্যাহত ৰাখে।
এই জয়ৰ ফলত আৰ্জেণ্টিনাই প্ৰি-কোৱাৰ্টাৰ ফাইনেলত স্থান নিশ্চিত কৰিলে। আনহাতে, প্ৰথমবাৰৰ বাবে বিশ্বকাপত অংশগ্ৰহণ কৰা কোবা ভাৰ্ডেৰ অনবদ্য অভিযানৰ অৱসান ঘটিল যদিও বিশ্ব চেম্পিয়ন দলটোক শেষ মুহূৰ্তলৈকে তীব্ৰ প্ৰত্যাহ্বান জনাই তেওঁলোকে গৌৰৱেৰে বিশ্ব মঞ্চ এৰিলে।