অহা বর্ষতো ধোনীয়ে নেতৃত্ব দিব চি এছ কেক

নিয়মীয়া বাৰ্তা, ২৮ অক্টোবৰঃ আই পি এলৰ ইতিহাসত প্রথমবাৰৰ বাবে চেন্নাই ছুপাৰ কিংছে লীগ পর্যায়ৰ পৰাই বিদায় মাগিলেও দলটোক লৈ গৌৰৱবোধ কৰে চি এছ কেৰ চি ই অ’ কাশী বিশ্বনাথনে৷ আই পি এলৰ প্লে’ অফৰ পূর্বে চেন্নাইৰ বিদায় সন্দর্ভত তেওঁ  কয় যে মহেন্দ্র সিং ধোনীৰ নেতৃত্বত চেন্নাই ছুপাৰ কিংছে তিনিবাৰকৈ আই পি এলত খিতাপ জয় কৰিছে৷

প্রতিবছৰে আমি প্লে’ অফলৈ উন্নীত হৈছোঁ৷ কোনো এটা দলে চেন্নাইৰ এই অভিলেখ স্পর্শ কৰিব পৰা নাই৷ গতিকে এবছৰৰ বেয়া প্রদর্শনে সকলোখিনি সলনি কৰি নেপেলায়৷

ইফালে, চলিত আই পি এলত শোচনীয়ভাৱে ব্যর্থ হ’লেও অধিনায়ক ধোনীয়ে অহা বর্ষৰ আই পি এলতো দলক নেতৃত্ব দিব বুলিও বিশ্বনাথনে আশা প্রকাশ কৰিছে৷ উল্লেখ্য যে ৩৯ বছৰীয়া ধোনীয়ে এইবাৰৰ আই পি এলত এতিয়ালৈকে মাত্র ১৯৯ ৰানহে সংগ্রহ কৰিবলৈ সক্ষম হৈছে৷