নিয়মীয়া বাৰ্তা, ২০ জানুৱাৰীঃ মহানগৰীৰ ভৰলুমুখ থানাৰ অন্তর্গত আঠগাঁও উৰণীয়া সেঁতুৰ সমীপৰ পৰা শনিবাৰে সন্ধিয়া পাঁচ লক্ষাধিক টকাসহ এজন যুৱক ৰহস্যজনকভাৱে সন্ধানহীন হৈ আছে ৷ সন্ধানহীন যুৱকজন গীতানগৰৰ গীতা পথৰ বাসিন্দা মুন্না কুমাৰ শ্বাহ ৷ আৰক্ষী সূত্রে জানিব পৰা মতে এল ডি এফ লজিষ্টিক কোম্পানীত কর্মৰত যুৱকজনে শনিবাৰে বেলতলাৰ পৰা কোম্পানীটোৰ ৪০ লাখ টকা অনাদায় ধন সংগ্রহ কৰি ফাঁচীবজাৰলৈ যায় ৷ ফাঁচীবজাৰকে ধৰি আঠগাঁও আৰু অন্যান্য স্থানৰ পৰা কোম্পানীৰ মুঠ ৫ লাখ টকা সংগ্রহ কৰে ৷ যুৱকজনে সংগৃহীত ধন কোম্পানীৰ কার্যালয়ত জমা দিবলৈ যোৱাৰ সময়তে আঠগাঁও উৰণীয়া সেঁতুৰ সমীপৰ পৰা ৰহস্যজনকভাৱে সন্ধানহীন হৈ পৰে ৷ যুৱকজনক ফোনত যোগাযোগ কৰি নোপোৱাত কোম্পানীৰ লোকে ভৰলুমুখ থানাত এজাহাৰ দাখিল কৰে ৷ এজাহাৰৰ ভিত্তিত আৰক্ষীয়ে এটা গোচৰ পঞ্জীয়ন কৰি তদন্ত অব্যাহত ৰাখিছে যদিও ২৪ ঘণ্টাৰ পিছতো তেওঁৰ সন্ধান উলিয়াব পৰা নাই ৷ পৰিয়ালৰ লোকে যুৱকজনক লুটৰ বাবে দুর্বৃত্তই অপহৰণ কৰা বুলি সন্দেহ ব্যক্ত কৰে যদিও আৰক্ষীয়ে এইক্ষেত্রত কোনো তথ্য লাভ কৰিবলৈ সক্ষম হোৱা নাই ৷ তদন্তৰ পিছত ঘটনাৰ প্রকৃত ৰহস্য পোহৰলৈ আহিব বুলি আৰক্ষী সূত্রই জানিবলৈ দিছে ৷