বিশেষ বাৰ্তা, ৯ মাৰ্চঃ বহুপ্ৰত্যাশিত পাঁচ ৰাজ্যৰ বিধানসভা নিৰ্বাচনৰ কাইলৈ ভোটগণনা। ইয়াৰে ভিতৰত সবাতোকৈ চৰ্চিত ৰাজ্যখন হৈছে উত্তৰ প্ৰদেশ। দেশৰ আটাইতকৈ বেছি সমষ্টি থকা ৰাজ্যখনৰ ভোটে প্ৰভাৱ পেলায় দেশৰ ৰাজনীতিতো। সপ্তম তথা অন্তিম পৰ্যায়ৰ ভোটগ্ৰহণ শেষ হোৱাৰ পাছতে চলিছে বিভিন্ন প্ৰতিষ্ঠানৰ এগজিট পোল। এই এগজিট পোল মতে, উত্তৰ প্ৰদেশত এইবাৰো বিজেপিৰ জয়জয়কাৰ। কেৱল এগজিট পোলৰ মতেই নহয়, জ্যোতিষশাস্ত্ৰ মতেও জয় নিশ্চিত বিজেপিৰ। দেশৰ আগশাৰীৰ কেইগৰাকীমান জ্যোতিষশাস্ত্ৰবিদে একেমুখে বিজেপিৰ পক্ষতে ভৱিষ্য়তদ্বাণী কৰিছে। কেন্দ্ৰীয় সংস্কৃত বিশ্ববিদ্যালয়ৰ জ্যোতিষশাস্ত্ৰবিদ অশ্বিনী পাণ্ডেই বিপুল ভোটত বিজেপিৰ জয়ৰ কথা ক’লে। একেদৰে, ৰাজ্যখনৰ মুখ্যমন্ত্ৰী যোগী আদিত্যনাথৰ ৰাশিফল মতে তেওঁ বৃহং জয়লাভ কৰিব বুলি ক’লে মীৰাটৰ প্ৰখ্যাত জ্যোতিষশাস্ত্ৰবিদ বিনোদ ত্যাগী আৰু মথুৰাৰ আলোক গুপ্তাই। একেদৰে, নিধি গুপ্তায়ো যোগীৰ ৰাশিফল মতে তেওঁৰ ভাগ্য উদয় হ’ব বুলিয়ে কৈছে।