বিশেষ বাৰ্তা, ১২মাৰ্চঃ এটি দেৱশিশুক নৃশংসভাবে হত্যা কৰাত ধলাজান বাগিচাৰ সমগ্ৰ পৰিবেশ উত্তপ্ত হৈ পৰিছে।ডিব্ৰুগড় জিলাৰ ৰহমৰীয়া আৰক্ষী থানাৰ অৰ্ন্তগত ধলাজান চাহ বাগিচাত এই নৃশংস হত্যাকাণ্ডই সকলোকে জোকাৰি গৈছে।এটি দেৱশিশুক কৰা হত্যাই কৰিছে ব্যাপক চাঞ্চল্যৰ।উজ্জ্বল মুড়া নামৰ এটি ৫ বছৰীয়া শিশুক ডিঙি কাটি নৃশংসভাৱে হত্যা কৰিলে একে লাইনৰ সুনীত তাঁতী নামৰ এজন ব্যক্তিয়ে।ডিব্ৰুগড়ৰ ধলাজান চাহ বাগিচাত সংঘটিত এই ঘটনাত টিং মেন লাইনৰ ৰাইজে পাছত হত্যাকাৰী সুনীত তাঁতীক খেদি খেদি হত্যা কৰি অৱশেষত জীৱন্তে জ্বলাই দিলে বুলি জানিব পৰা গৈছে।পৰিস্থিতি নিয়ন্ত্ৰণৰ বাবে ডিব্ৰুগড়ৰ পৰা যোৱা বিশাল আৰক্ষী আৰু অৰ্ধসামৰিক বাহিনীয়ে বহু কৌশলৰে অৱশেষত পৰিস্থিতি নিয়ন্ত্ৰণ কৰিবলৈ সক্ষম হয়।ঘটনাস্থলীত ডিব্ৰুগড় আৰক্ষী অধীক্ষক স্বেতাংগ মিশ্ৰাসহ বৃহৎ আৰক্ষী আৰু অৰ্ধসামৰিক বাহিনী উপস্থিত হৈ সকলো নিৰিক্ষণত ৰাখিছে বুলি জানিব পৰা গৈছে।ঘটনাৰ বিবৰণী মতে ডিব্ৰুগড়ৰ ৰহমৰীয়া থানাৰ অন্তৰ্গত ধলাজান চাহ বাগিচাত এটি ৫ বছৰীয়া শিশুৱে সমনীয়াৰ সৈতে খেলি থকা অৱস্থাত সুনীত তাঁতী নামৰ ব্যক্তিজনে শিশু উজ্জ্বল তাঁতীক ডিঙি আৰু হাত কাটি হত্যা কৰা ঘটনাক কেন্দ্ৰ কৰি সমগ্ৰ পৰিৱেশ উতপ্ত হৈ পৰে।জানিব পৰা মতে শিশুটিয়ে আবেলি নিজ ঘৰৰ সন্মুখৰ পথাৰত সমনীয়াৰ সৈতে খেলি থকা সময়তে ধলাজান মেইন লাইনৰ অভিমুন্য তাঁতী ওৰফে সুনীত (৩৫) নামৰ ব্যক্তিজনে আকস্মিকভাবে শিশুটিৰ ওপৰত জঁপিয়াই দাৰে ঘপিয়াই হত্যা কৰে।এই ঘটনা বিয়পি পৰাৰ লগে লগে লাইনৰ সকলো জনতা ক্ষোভ আৰু উত্তেজনাত ফাটি পৰে।তাৰ পিছতে সেই লাইনৰ উত্তেজিত জনতাই হত্যাকাৰী অভিমুন্য তাঁতীক পথাৰ মাজৰে খেদি খেদি দা, লাঠিৰে কোবাই কোবাই হত্যা কৰি পথাৰত থকা খেৰৰ মাজত পেলাই জ্বলাই দিয়ে।তীব্ৰ জুইৰ লেলিহান শিখাই নিমিষতে সুনীতক গ্ৰাহ কৰি পেলায় আৰু জুইত অগ্নিদগ্ধ হৈ মৃত্যু হয়।ঘটনা কেন্দ্ৰ কৰি বৰ্তমানেও ধলাজান বাগিচাত তীব্ৰ চেপা উত্তেজনা অব্যাহত আছে।ঘটনাস্থলীত ডিব্ৰুগড় আৰক্ষী অধীক্ষক স্বেতাংগ মিশ্ৰা, চাবুৱা আৰক্ষী চক্ৰ পৰিদৰ্শক, ৰহমৰীয়া থানাৰ ভাৰপ্ৰাপ্ত বিষয়াৰ লগতে আৰক্ষী অৰ্ধসামৰিক বাহিনী উপস্থিত হৈ পৰিস্থিতি নিয়ন্ত্ৰণ কৰাৰ প্ৰচেষ্টা অব্যাহত ৰাখিছে।জানিব পৰা মতে বৰ্তমান মৃতদেহ দুটি মৰণোত্তৰ পৰীক্ষাৰ বাবে ডিব্ৰুগড়ৰ মেডিকেললৈ প্ৰেৰণ কৰিছে।ঘটনাটো কিয় সংঘটিত হল সেয়া এতিয়াও স্পষ্ট হোৱা নাই আৰু আৰক্ষীয়ে অদ্যাপি কোনো লোককে আটক বা গ্ৰেপ্তাৰ কৰা নাই।
প্ৰেৰক বিভাস দুৱৰা।