নিয়মীয়া বাৰ্তা, ৭অক্টোবৰঃ নৱম হিৰো ইণ্ডিয়ান ছুপাৰ লীগত আজি অভিযান আৰম্ভ কৰিব উত্তৰ–পূবৰ দল নর্থ ইষ্ট ইউনাইটেড এফ চিয়ে৷ নতুন ছিজনৰ প্রথম মেচত নর্থ ইষ্টৰ প্রতিদ্বন্দ্বী হ’ল আই এছ এলৰ প্রাক্তন চেম্পিয়ন বাংগালুৰু এফ চি৷ আজি বাংগালুৰু শ্রীকান্তিৰাবা ষ্টেডিয়ামত হ’বলগীয়া মেচখনত ঘৰুৱা দল বাংগালুৰু এফ চি ফেভাৰিট৷ কাৰণ নর্থ ইষ্টে আই এছ এলৰ ইতিহাসত কেতিয়াও এইখন ষ্টেডিয়ামত জয়ৰ মুখ দেখা নাই৷ আজিৰ মেচক লৈ নর্থ–ইষ্টৰ প্রশিক্ষক মার্কো বালবুলে কয়, ‘লীগৰ অন্যতম শক্তিশালী দলটোৰ বিৰুদ্ধে মেচখন কঠিন হ’ব৷ কিন্তু আমি ভাল প্রস্তুতি কৰিছোঁ৷ আমি এটা নতুন যুৱ দল আৰু অভিজ্ঞ বিদেশীৰ সৈতে সাজু হৈছোঁ৷ ছিজনৰ প্রথমখন খেলত জয়ী হ’বলৈ আমাৰ একত্রিত প্রচেষ্টা থাকিব৷’