নিয়মীয়া বাৰ্তা, ১০ অক্টোবৰঃ দুলীয়াজান সমষ্টিৰ অন্তৰ্গত জৰাজীৰ্ণ বাট-পথৰ সমস্যাসমূহ সমাধানৰ অৰ্থে দুলীয়াজান আঞ্চলিক ছাত্ৰ সন্থাৰ দীৰ্ঘদিনীয়া প্ৰতিবাদৰ পাছতো সংশ্লিষ্ট কৰ্তৃপক্ষৰ গা-নলৰাত পুনৰ সৰৱ হৈ উঠে আঞ্চলিক ছাত্ৰ সন্থা। আজি ইয়াৰ প্ৰতিবাদকল্পে যৌথভাৱে টিংৰাই চাৰিআলিত মানৱ শৃংখল কাৰ্যসূচী ৰূপায়ণ কৰে দুলীয়াজান আঞ্চলিক, টেঙাখাট আঞ্চলিক আৰু নাহৰকটীয়া আঞ্চলিকে। উল্লেখযোগ্য যে লাহোৱালৰ পৰা টিংৰাই চাৰিআলি হৈ বালিজান-মাধপুৰৰ পথচোৱাৰ মাজে মাজে পুখুৰী সদৃশ দুৰাৱস্থাই স্থানীয় ৰাইজক জ্বলাকলা খুৱাই আহিছে। দুলীয়াজান সমষ্টিৰ শোচনীয় বাট-পথে বৰ্তমান চৰকাৰখনৰ উন্নয়ণৰ শ্লোগানৰ ফোঁপোলা স্বৰূপটোকে উদঙাই দিয়া বুলি প্ৰতিবাদী ছাত্ৰ কৰ্মীসকলে ক্ষোভেৰে আজি ব্যক্ত কৰে । প্ৰায় দুঘন্টা ধৰি ৰূপায়ণ কৰা এই প্ৰতিবাদী কাৰ্যসূচীৰ অন্ততঃ টেঙাখাট ৰাজহ চক্ৰৰ চক্ৰ বিষয়াৰ যোগেদি জিলা উপায়ুক্তলৈ এক স্মাৰক পত্ৰ প্ৰদান কৰি সাময়িকভাৱে স্হগিত ৰাখে প্ৰতিবাদী কাৰ্যসূচী। ডিব্ৰুগড় জিলা ছাত্ৰ সন্হাৰ আহ্বানমৰ্মে গ্ৰহণ কৰা এই কাৰ্যসূচীত সক্ৰিয় অংশগ্ৰহণ কৰে সদৌ ডিব্ৰুগড় জিলা ছাত্ৰ সন্হাৰ উপ সভাপতিদ্বয় কনক গগৈ, ধনজীৎ সন্দিকৈ, সাংগঠনিক সম্পাদক বিতুপন গগৈ, সাংস্কৃতিক সম্পাদক প্ৰদীপ গগৈ, সাহিত্য সম্পাদক অৰ্জুন ছেত্ৰী, কাৰ্যনিৰ্বাহক সদস্য বুবুল তালুকদাৰ, দুলীয়াজান আঞ্চলিকৰ সভাপতি দিগন্ত বড়া, সাঃ সম্পাদক সমীৰণ গগৈ, টেঙাখাত আঞ্চলিক ছাত্ৰ সন্থাৰ সভাপতি অভিজিত শইকীয়া, সাঃ সম্পাদক প্ৰকাশ শইকীয়া, নাহৰকটীয়া আঞ্চলিকৰ সভাপতি-সম্পাদক ত্ৰিদীপ শইকীয়া আৰু নিপু ভূঞা ।
প্ৰেৰক কৃষ্ণা গগৈ