নগাঁৱৰ ঐতিহ্যমণ্ডিত মিছন স্কুলৰ ১৭৫ বছৰীয়া জয়ন্তী

নিয়মীয়া বাৰ্তা, ১৭ নৱেম্বৰ:  বৰ্ণিল সাংস্কৃতিক শোভাযাত্ৰাৰে মুখৰিত হৈ পৰিল নগাঁও । অসমৰ লগতে ভাৰতীয় বিভিন্ন জাতি-জনগোষ্ঠীৰ স্বকীয় কলা-সংস্কৃতিয়ে প্ৰাণ পাই উঠিলে নগাঁও চহৰৰ ৰাজপথত । ভাষাৰ কাণ্ডাৰী তথা আমেৰিকান ব্যাপ্তিষ্ট মিচনেৰী মাইলছ ব্ৰনচনে ১৮৪৬ চনতে নগাঁও চহৰৰ মাজমজিয়াত প্ৰতিষ্ঠা কৰা নগাঁও মিছন উচ্চতৰ মাধ্যমিক বিদ্যালয়ৰ গৌৰৱোজ্জল ১৭৫ বছৰীয়া জয়ন্তীৰ উপলক্ষ্যে শিক্ষানুষ্ঠানখনৰ পৰা আজি উলিওৱা হয় এই সুবৃহৎ সাংস্কৃতিক শোভাযাত্ৰা । প্ৰথমাৱস্থাত অনাথ শিশুৰ শিক্ষানুষ্ঠান ৰূপে আত্মপ্ৰকাশ কৰা বিদ্যালয়খনে পৰৱৰ্তী সময়ত অসমৰ প্ৰথমখন নাৰী শিক্ষাৰ প্ৰতিষ্ঠান ৰূপে সেৱা আগবঢ়াই । কালক্ৰমত ঐতিহ্যমণ্ডিত বিদ্যালয়খন সহশিক্ষা প্ৰতিষ্ঠানলৈ পৰ্যবসিত হয় আৰু বিদ্যালয়ৰ মহান ঐতিহ্যক আদৰ্শ হিচাপে লৈ অসমৰ শিক্ষা জগতত এক সুকীয়া স্থানেৰে আজিৰ পৰ্যায়ত উপনীত হৈছে । অসমৰ শৈক্ষিক জগতত নিজৰ নাম খোদিত কৰিবলৈ সক্ষম হোৱা বিদ্যালয়খনৰ প্ৰতিষ্ঠাৰ ১৭৫ বছৰীয়া জয়ন্তী কালিৰ পৰা পৰা দুদিনীয়াকৈ বৰ্ণাঢ্য কাৰ্যসূচীৰে বিদ্যালয়ৰ প্ৰাংগনত অনুষ্ঠিত হয়। ১৭৫ খনকৈ পতাকা উত্তোলনৰে দুদিনীয়া কাৰ্যসূচীৰ শুভাৰম্ভ হোৱা ১৭৫ বছৰীয়া জয়ন্তীৰ কাৰ্যসূচীৰ অংশৰূপে প্ৰদৰ্শনী ,স্মৃতিগ্ৰন্থ উন্মোচন , সতীৰ্থ সন্মিলন ,মুকলি সভা আৰু প্ৰাক্তন  ছাত্ৰ- ছাত্ৰী তথা বিদ্যালয়ৰ বৰ্তমানৰ ছাত্ৰ – ছাত্ৰীৰ দ্বাৰা এক সাংস্কৃতিক অনুষ্ঠানো অনুষ্ঠিত হয় । আজি দিনৰ ১২ বজাত নগাঁৱৰ মাজ-মজিয়াৰে উলিওৱা সাংস্কৃতিক শোভযাত্ৰা উদ্ঘাটন কৰে ৰাষ্ট্ৰীয় খ্যাতিসম্পন্ন অভিনেত্ৰী তথা শিক্ষাবিদ মলয়া গোস্বামীয়ে । ইপিনে কণ্ঠশিল্পী দ্বীপলীনা ডেকাৰ সংগীতানুষ্ঠানেৰে শিক্ষানুষ্ঠানখনৰ ১৭৫ বছৰীয়া জয়ন্তীৰ সামৰণি পৰে ।