বিশেষ বাৰ্তা, ৪ মাৰ্চ : ছনী টিভিৰ ৰাষ্ট্ৰীয় পৰ্যায়ৰ কুকিং ৰিয়েলিটি শ্ব’ মাষ্টাৰ চেফ ইণ্ডিয়া’ৰ চিজন-৭ৰ খিতাপ দখল কৰি অসম তথা তিনিচুকীয়ালৈ গৌৰৱ কঢ়িয়াই আনিবলৈ সক্ষম হোৱা তিনিচুকীয়াৰ গোবিন্দপুৰ নিবাসী নয়নজ্যোতি শইকীয়াক আজি তিনিচুকীয়া জিলা প্ৰশাসনৰ তৰফৰ পৰা সম্বৰ্ধনা জ্ঞাপন কৰা হয়। 
মাষ্টাৰ চেফ চিজন-৭ৰ বিজয়ীগৰাকীক সম্বৰ্দ্ধনা জ্ঞাপন কৰি জিলা উপায়ুক্ত স্বপ্নীল পালে সমগ্ৰ ভাৰতবৰ্ষতে অসম তথা তিনিচুকীয়াৰ নাম জিলিকাই তোলাৰ বাবে নয়নজ্যোতি শইকীয়াক অভিনন্দন জ্ঞাপন কৰাৰ লগতে অনাগত দিনত বিশ্বৰ দৰবাৰতো অসম তথা তিনিচুকীয়াৰ নাম জিলিকাই তুলিবলৈ সক্ষম হব বুলি আশা প্ৰকাশ কৰে। মাষ্টাৰ চেফ নয়নজ্যোতি শইকীয়াৰ সফলতাই আন বহুতকে উৎসাহিত কৰিব বুলিও উপায়ুক্তগৰাকীয়ে উল্লেখ কৰে। জিলা উপায়ুক্ত কাৰ্য্যালয়ৰ সভাকক্ষত জিলা উন্নয়ন আয়ুক্ত সুশান্ত দত্তই আঁত ধৰা সম্বৰ্দ্ধনা জ্ঞাপন অনুষ্ঠানত অতিৰিক্ত উপায়ুক্ত চৰফৰাজ হক, অতিৰিক্ত উপায়ুক্ত মনজিৎ বৰকাকতী প্ৰমুখ্যে জিলা প্ৰশাসনৰ অন্যান্য উচ্চ পদস্থ বিষয়াসকলৰ লগতে উপায়ুক্ত কাৰ্য্যালয়ৰ কৰ্মচাৰীসকল উপস্থিত থাকে।
প্ৰেৰক বিবেক বড়া