🏏 দেওধৰ ট্রফী : বলিঙতো চাৰিটা উইকেট লাভ অসম-সন্তানৰ
বিশেষ বাৰ্তা, ২৮ জুলাই : অসম-সন্তান ৰিয়ান পৰাগৰ অলৰাউণ্ড প্রদর্শনৰ সহায়ত পূব মণ্ডলে চলিত দেওধৰ ট্রফীৰ আজি অনুষ্ঠিত মেচখনত জয়লাভ কৰি সম্পূর্ণ পইণ্ট অর্জন কৰিছে৷ পডুচেৰীত অনুষ্ঠিত মেচখনত পূব মণ্ডলে উত্তৰ মণ্ডলক ৮৮ ৰানত পৰাস্ত কৰে৷ মেচখনত পূব মণ্ডলৰ জয়ৰ মূলতে আছিল ৰিয়ান পৰাগৰ দুর্দান্ত বেটিং আৰু বলিং প্রদর্শন৷ প্রথমে বেট ধৰি প্রাৰম্ভিক বিপর্যয় সত্ত্বেও ৰিয়ান পৰাগৰ শতক আৰু কুমাৰ কুছাগ্রাৰ দুর্দান্ত ৯৮ ৰানৰ সহায়ত পূব মণ্ডলে নির্ধাৰিত ৫০ অভাৰত ৮টা উইকেট হেৰুৱাই ৩৩৭ ৰান সংগ্রহ কৰে৷ ৰিয়ান পৰাগে ১০২টা বলত ৫টা চাৰি আৰু ১১টা ছয়েৰে ১৩১ ৰানৰ চমকপ্রদ ইনিংছ দলক উপহাৰ দিয়ে৷ দলীয় স্ক’ৰ ৫৭ ৰানতে ৫টাকৈ উইকেট হেৰুৱাই দলটো বিপদত পৰিছিল যদিও ৰিয়ানে কুছাগ্রাৰ সৈতে লগ লাগি ষষ্ঠ উইকেটত ২৩৫ ৰান সংগ্রহ কৰি দলক সবল স্থিতিত উপনীত কৰোৱায় ৷ ৰিয়ানৰ বিধ্বংসী বলিঙৰ সন্মুখত উত্তৰ মণ্ডলে ৪৫.৩ অভাৰত আটাইকেইটা উইকেট হেৰুৱাই ২৪৯ ৰানহে কৰে৷ মনদীপ সিঙে সর্বাধিক ৫০ ৰান কৰে৷ পূব মণ্ডলৰ হৈ ৰিয়ানে চাৰিটা আৰু ছাহবাজ আহমেদে তিনিটা উইকেট লাভ কৰে৷ উল্লেখ্য যে পূব মণ্ডলে এতিয়ালৈকে তিনিখন মেচৰ আটাইকেইখনতে জয়লাভ কৰি ১২ পইণ্টেৰে পইণ্ট তালিকাৰ দ্বিতীয় স্থানত আছে৷