নিয়মীয়া বাৰ্তা, ১৭ ফেব্রুৱাৰীঃ সোমবাৰে তেজপুৰৰ ডিপোটা দলঙৰ ওপৰত সংঘটিত হয় ভয়াবহ পথ দুৰ্ঘটনা। বিপৰীতমুখী ট্ৰাক আৰু ইয়ন গাড়ীৰ মাজত হোৱা মুখামুখি সংঘৰ্ষত থিতাতে নিহত হয় ইয়নখনৰ চালক । ইফালে এই দুৰ্ঘটনাত ট্ৰাকখন নিয়ন্ত্ৰণ হেৰুৱাই দলঙৰ তলত বাগৰি পৰে । দুৰ্ঘটনা সংঘটিত কৰিয়ে ট্ৰাকখনৰ চালক, হেণ্ডিমেন ঘটনাস্থলিৰ পৰা পলায়ন কৰে ।
আনহাতে মৰিগাঁৱৰ ভূৰাগাঁৱতো আজি পুৱাই সংঘটিত হয় আন এক পথ দুৰ্ঘটনা । পথৰ পৰা বাগৰি তিনি লুটি খাই পথাৰত পৰিল যাত্ৰীবাহী মেক্সিম’ । কথমপি প্ৰাণ ৰক্ষা পৰি চালকসহ পাঁচ জন লোকৰ ।
ইয়াৰোপৰি ৰাতিপুৱাই দুধনৈৰ ১৭ নং ৰাষ্ট্ৰীয় ঘাইপথত সংঘটিত হ’ল আন এক ভয়ংকৰ পথ দুৰ্ঘটনা ৷ শ্বিলঙৰ পৰা তুৰা অভিমুখে গৈ থকা ছুইফ্ট ডিজেয়াৰ বাহন এখনে নিয়ন্ত্ৰণ হেৰুৱাই কালভাৰ্ট এটাত খুন্দা মাৰি পথৰ পৰা দ’ খাৱৈত বাগৰি পৰে ৷ জানিব পৰা মতে একেটা পৰিয়ালৰে চাৰিজন সদস্যই তুৰালৈ বুলি গৈ থকাৰ সময়তে ঘণ কুঁৱলীৰ বাবে এই দুৰ্ঘটনাটো সংঘটিত হোৱাৰ অনুমান কৰা হৈছে ৷ আহত আটাইকেইজনকে উন্নত চিকিৎসাৰ বাবে গুৱাহাটীলৈ প্ৰেৰণ কৰিছে ৷ দুৰ্ঘটনাগ্ৰস্ত বাহনখনৰ নম্বৰ – ML 05S 1133 ৷