নিয়মীয়া বাৰ্তা, ১০ অক্টোবৰ : কামৰূপৰ ছমৰীয়া সত্ৰৰ ৰামসৰস্বতী খেলপথাৰত আজিৰে পৰা আৰম্ভ হৈছে ‘ৰামসৰস্বতী সোঁৱৰণী প্ৰাইজমানি ফুটবল প্ৰতিযোগিতা’ ২৯ অক্টোবৰলৈ অনুষ্ঠিত হ’ব লগা এই প্ৰাইজমানি ফুটবল প্ৰতিযোগিতাৰ আজি এক বৰ্ণাঢ্য আয়োজনেৰে উদ্বোধনী প্ৰথম খেলখন অনুষ্ঠিত হয় ৷ খেল উদ্ধোধনৰ প্ৰাকমূহৰ্তত খেলপথাৰত খেলুৱৈ তথা সমিতিৰ সকলো বিষয়ববীয়া তথা উপস্থিত দৰ্শক ৰাইজে ৰাষ্ট্ৰীয় সংগীত পৰিৱেশন কৰে। ইয়াৰ পিছতে ছমৰীয়া সত্ৰৰ পৰা ৰাজ্য চৰকাৰে অনুষ্ঠিত কৰা বিহুক গ্ৰীনিজ বুক অৱ ৱল্ড ৰেকৰ্ডত সন্নিৱিষ্ট কৰাত অংশগ্ৰহন কৰা ১৩ গৰাকী বিহুৱতীয়ে খেলপথাৰত বিহু প্ৰদৰ্শন কৰে। ছমৰীয়া সত্ৰৰ অগ্ৰণী ক্ৰীড়া সংগঠন ‘ছমৰীয়া আঞ্চলিক যুৱক সংঘ’ৰ উদ্যোগত আৰু ‘ৰামসৰস্বতী সোঁৱৰণি ফুটবল প্ৰতিযোগিতা পৰিচালনা সমিতি’ৰ সহযোগত অনুষ্ঠিত হোৱা আমন্ত্ৰনমূলক এই প্ৰাইজমানি ফুটবল প্ৰতিযোগিতাখনিৰ আজি শুভ উদ্বোধন কৰে ছমৰীয়া সত্ৰৰ প্ৰাক্তন ফুটবল খেলুৱৈ পদ্মধৰ মহন্ত আৰু প্ৰিয় বৰাই ৷ উদ্বোধনী খেলখন অনুষ্ঠিত হয় আজাৰাৰ ‘নৰ্থ ইষ্ট ইলাইট ছোচাৰ স্কুল এফ চি বনাম নিজ বৰুৱাৰ নৱজ্যোতি এফ চিৰ মাজত ৷ তীব্ৰ উত্তেজনাপূৰ্ণ উদ্বোধনী খেলখনত আজাৰাৰ নৰ্থ ইষ্ট এলিট ছোচাৰ এফ চি ৩-২ গ’লৰ ব্যৱধানত বিজয়ী হয় ৷ উদ্বোধনী খেলত হিৰো অৱ দ্য মেচৰ পুৰস্কাৰ লাভ কৰে আজাৰাৰ ‘নৰ্থ ইষ্ট ইলাইট ছোচাৰ স্কুল এফ চিৰ ৰাজ আলীয়ে৷ উল্লেখ্য প্ৰাইজমানি ফুটবল প্ৰতিযোগিতাখনৰ চূড়ান্ত বিজয়ীয়ে পুৰস্কাৰ হিচাবে নগদ ৩০,০০১ টকাৰ লগতে ট্ৰফী আৰু ৰাণাৰ্চ দলে ২০,০০১ টকাৰ লগতে ট্ৰফী লাভ কৰিব বুলি ৰামসৰস্বতী সোঁৱৰণি ফুটবল প্ৰতিযোগিতা পৰিচালনা সমিতি’ৰ সভাপতি ৰিণ্টু বৰা আৰু সম্পাদক ৰূপম কলিতাই জানিব দিছে।
প্ৰেৰক প্ৰীতম বায়ন