বিশেষ বাৰ্তা, ১৭ নৱেম্বৰ:- তিনিচুকীয়া জিলাখনৰ বিভিন্ন প্ৰান্তৰ লগতে চহৰখনৰ নিকটৱৰ্তী মফচলীয়া অঞ্চলসমূহত বিলাতী সুৰাৰ লগতে চুলাই মদৰ এক বৃহৎ বজাৰ গঢ় লৈ উঠিছে । আবকাৰী বিভাগৰ লগতে আৰক্ষীয়ে এই অবৈধ সুৰাৰ বিৰুদ্ধে সময়ে সময়ে অভিযান চলাই আহিছে যদিও নিয়ন্ত্ৰণ কৰিব পৰা নাই অবৈধ সুৰাৰ ব্যৱসায়টো । ইয়াৰ মাজতে আজি তিনিচুকীয়া সদৰ আবকাৰী চক্ৰৰ এটা বৃহৎ দ’লে আৰক্ষীৰ সহযোগত চলোৱা এক অভিযানত বুজন পৰিমাণৰ চুলাই মদ নষ্ট কৰাৰ লগতে কেইবাটাও চুলাই ভাটি উচ্ছেদ কৰে । আবকাৰীৰ দলটোৱে গুইজান আৰক্ষী চকীৰ অন্তৰ্গত নতুন গাঁও, বাৰেকুৰি আৰক্ষী থানাৰ অন্তৰ্গত কাটানি আৰু মাকুম আৰক্ষী থানাৰ অন্তৰ্গত চান্দমাৰীত অভিযান চলায়৷ অভিযান চলাই প্ৰায় ২৪ শ লিটাৰ চুলাই মদ বনোৱা গেলাপাছ আৰু ৬০ লিটাৰ চুলাই মদ নষ্ট কৰাৰ লগতে ৫ টা চুলাই ভাটি উচ্ছেদ কৰে । তিনিচুকীয়া সদৰ আবকাৰী চক্ৰৰ পৰিদৰ্শক জয়ন্ত ৰাজখোৱাই এনেদৰেই প্ৰতিদিনেই অবৈধ সুৰাৰ বিৰুদ্ধে অভিযান চলি থাকিব বুলি সদৰী কৰাৰ লগতে এনেধৰণৰ পন্থা অৱলম্বন নকৰিবলৈ সকলো ৰাইজক আহ্বান জনায়।
প্ৰেৰক বিবেক বড়া