নিয়মীয়া বাৰ্তা, ২৩ ফেব্রুৱাৰীঃ গুৱাহাটী বিশ্ববিদ্যালয়ত দ্বিতীয়বাৰৰ বাবে দুদিনীয়া কার্যসূচীৰে অনুষ্ঠিত হ’ব ছবি মহোৎসৱ ৷ ২৮ আৰু ২৯ ফেব্রুৱাৰীত গুৱাহাটী বিশ্ববিদ্যালয়ৰ গণসংযোগ আৰু সাংবাদিকতা বিভাগৰ উদ্যোগত আয়োজন কৰা হৈছে এই ছবি মহোৎসৱৰ ৷ গুৱাহাটী বিশ্ববিদ্যালয়ৰ চৌহদত জোনাকী ফিল্ম ফেষ্টিভেলক লৈ দেখা গ’ল ব্যাপক প্রস্তুতি ৷ অসমৰ লগতে ৰাষ্ট্রীয় তথা আন্তঃৰাষ্ট্রীয় বঁটাপ্রাপ্ত কেইবাখনো ছবি এই মহোৎসৱত প্রদর্শিত হ’ব বুলি মন্তব্য কৰে বিশ্ববিদ্যালয়খনৰ ছাত্র–ছাত্রীয়ে ৷ লগতে আমিষ,বুলবুল কেন ছিং, বৰনদী ভটিয়াই আদিৰ লগতে বডো, মিচিং আৰু অৰুণাচলী ছবিও প্রদর্শন কৰা হ’ব বুলি মন্তব্য কৰে আয়োজকে ৷ এই ছবি মহোৎসৱৰ লগত সংগতি ৰাখি কুইজ আৰু চুটি ছবি প্রতিযোগিতাৰো আয়োজন কৰা হৈছে ৷ ইতিমধ্যেই আৰম্ভ হৈছে ছবি মহোৎসৱখনৰ পঞ্জীয়ন প্রক্রিয়া ৷ উল্লেখ্য যে এই মহোৎসৱৰ জৰিয়তে ছবি নির্মাতা আৰু নৱাগত শিল্পীৰ অপূর্ব সমাহাৰ ঘটিব গুৱাহাটী বিশ্ববিদ্যালয়ত ৷ ‘জোনাকী’ৰ বাবে সাজু গুৱাহাটী বিশ্ববিদ্যালয় ৷