🔹 দুইজাঁইকৈ গুলী ফুটাই সন্ত্ৰাস সৃষ্টি কুণালৰ !
বিশেষ বাৰ্তা, ২৭ ডিচেম্বৰ : মহানগৰীৰ সোণাইঘূলিত এক চাঞ্চল্যকৰ গুলীচালনাৰ ঘটনা সংঘটিত হয়। কুণাল ৰয় নামৰ এজন যুৱকে এই ঘটনা সংঘটিত কৰাৰ অভিযোগ উত্থাপন হৈছে। উল্লেখ্য যে কিছুদিন পূৰ্বে এগৰাকী ছাত্ৰীক কুণালে শাৰীৰিকভাৱে নিৰ্যাতন চলোৱাৰ অভিযোগ উত্থাপন হৈছিল। তদুপৰি কুণালে ছাত্ৰীগৰাকীক প্ৰাণে মৰাৰ ভাবুকিও প্ৰদান কৰা বুলি জানিব পৰা গৈছে। ছাত্ৰীগৰাকীৰ অভিযোগৰ ভিত্তিত পৰিয়ালৰ লোকৰ লগতে কিছুসংখ্যক যুৱক কুণালৰ বাসগৃহত উপস্থিত হোৱাৰ পিছতেই কুণালে দুই জাঁইকৈ গুলী ফুটোৱাৰ অভিযোগ উত্থাপন হৈছে। এই গুলীচালনাৰ ঘটনাত কথমপি ৰক্ষা পৰে ভাৰ্গৱ নামৰ এজন যুৱক। এই ঘটনাৰ পিছতেই পলায়ন কৰে কুণালে। ঘটনাস্থলীত ওদালবাক্ৰা আৰক্ষী উপস্থিত হৈ কুণাল ৰয়ক আটক কৰে। ঘটনা সন্দৰ্ভত আৰক্ষীয়ে তদন্ত অব্যাহত ৰাখিছে।