নিয়মীয়া বাৰ্তা, ২৪ ফেব্ৰুৱাৰীঃ কম্বোডিয়াত সুদীর্ঘ ৪৭ বছৰ পিছত ৯৮ আৰু ১০১ বছৰ বয়সীয়া দুগৰাকী ভগ্নী পুনৰ মিলিত হোৱা ঘটনাক লৈ সংবাদ মাধ্যমত ব্যাপক চর্চা চলিছে৷ দুয়োগৰাকী ভগ্নীৰ মাজত অন্তিমবাৰলৈ দেখা দেখি হৈছিল ১৯৭৩ চনত৷ কমিউনিষ্ট পল পট নেতৃত্বাধীন চৰকাৰে দেশখন শাসন কৰিবলৈ লোৱাৰ দুবছৰ পূর্বে ৯৮ বছৰীয়া বান ছেনে জ্যেষ্ঠ ভগ্নী বান চী আৰু কনিষ্ঠ ভাতৃৰ সৈতে অন্তিমবাৰলৈ মিলিত হৈছিল৷ স্থানীয় এটা এনজি’ৰ সহায়ত ৯৮ বছৰীয়া বান ছেনে জ্যেষ্ঠ ভগ্নী আৰু ভাতৃৰ সৈতে ৰাজধানী নম পেনৰ পৰা ৯০ মাইল নিলগৰ কামপং চাম প্রদেশৰ জন্ম গাঁৱত মিলিত হোৱাৰ সুযোগ লাভ কৰিছে৷
উল্লেখনীয় যে খেমেৰ ৰুজৰ শাসনৰ সময়ত কম্বোডিয়াত প্রাণ হেৰুৱাইছিল প্রায় দুই নিযুত লোকে৷ পল পট আছিল খেমেৰ ৰুজৰ অতি কুখ্যাত শাসক৷ পল পটৰ সময়তে বহু পৰিয়ালৰ মাজত বিচ্ছেদ হৈছিল৷ নিৰাপদ স্থানত গৈ বহু লোকে আশ্রয় গ্রহণ কৰিবলগীয়া হৈছিল৷ বান ছেনে ৰাজধানীৰ সমীপতে এক অস্থায়ী কলনীত বাস কৰিবলৈ লৈছিল যদিও জন্ম গাঁৱৰ ভাতৃ–ভগ্নীৰ সৈতে মিলিত হোৱাৰ সপোন আছিল মহিলাগৰাকীৰ৷ শুকুৰবাৰে মহিলাগৰাকীৰ এই সপোন বাস্তৱায়িত হয়৷