বাৰ্তা ডিজিটেল ডেস্ক,১০ জানুৱাৰীঃ মুখ্যমন্ত্রী ড০ হিমন্ত বিশ্ব শর্মাৰ ফেচবুক একাউণ্ট হেক কৰাৰ অপচেষ্টা চলোৱাৰ তথ্য পোহৰলৈ আহিছে। মুখ্যমন্ত্রীগৰাকীয়ে টুইটৰ জৰিয়তে এই কথা সদৰী কৰে ৷ এক টুইটত তেওঁ কয়– কালি সন্ধিয়া অচিনাক্ত হেকাৰে মোৰ ফেচবুক একাউণ্ট হেক কৰিবলৈ চেষ্টা কৰে ৷ প্রাথমিক অনুসন্ধানত পোহৰলৈ অহা তথ্য অনুসৰি পাকিস্তানৰ পৰা হেকাৰ পৰিচালিত হ’ব পাৰে ৷ দুর্বৃত্তক চিনাক্তকৰণৰ বাবে অনুসন্ধান অব্যাহত আছে বুলি মুখ্যমন্ত্রীয়ে জানিবলৈ দিয়ে ৷ উল্লেখ্য যে মুখ্যমন্ত্রী ড০ শর্মাৰ ফেচবুক একাউণ্টৰ বর্তমান অনুগামীৰ সংখ্যা দুই নিযুত৷ দৈনন্দিন সভা–সমিতিৰ লগতে চৰকাৰে গ্রহণ কৰা বিভিন্ন আঁচনি, পদক্ষেপ আদিৰ বিষয়ে মুখ্যমন্ত্রীগৰাকীয়ে ফেচবুক একাউণ্টৰ জৰিয়তে নিতৌ সদৰী কৰি আহিছে ৷