🔹 ৬৭ বছৰীয়া বিজ্ঞানীৰে ‘মিডিয়া বেৰন’ৰ প্রেম
বিশেষ বাৰ্তা, ৯ মার্চ : বয়স ৯২৷ কিন্তু বয়সক গুৰুত্ব নিদিয়ে ‘মিডিয়া বেৰন’ ৰূপার্ট মার্ডকে৷ ৯২ বছৰ বয়সত পঞ্চমবাৰলৈ বিবাহপাশত আবদ্ধ হোৱাৰ বাবে সাজু হৈছে ৰূপার্ট মার্ডক৷ ৰূপার্টৰ সংস্থা ‘নিউজ কর্প’ সমগ্র বিশ্বৰ বহু স্থানীয়, ৰাষ্ট্রীয় আৰু আন্তর্জাতিক সংবাদ মাধ্যমৰ মালিক৷ ইয়াৰ ভিতৰত আছে বহু দামী দামী সংবাদ মাধ্যমৰ নামো৷ সংবাদ পত্র ‘নিউয়র্ক টাইমছ’ৰ প্রতিবেদন অনুসৰি, অহা জুন মাহত ৰূপার্টে এলেনা জুকোভাৰ সৈতে বিবাহপাশত আবদ্ধ হ’ব৷ পৰহি মার্ডকে এই কথা নিজেই ঘোষণা কৰিছে৷ ইয়াৰ পূর্বে ৪ বাৰ বিবাহপাশত আবদ্ধ হৈছিল ৰূপার্ট মার্ডক৷ সংবাদ মাধ্যমৰ প্রতিবেদন অনুসৰি, যোৱা বছৰ তৃতীয় পত্নী ৱেণ্ডি ডেঙৰ সূত্রে ৬৭ বছৰ বয়সীয়া অৱসৰপ্রাপ্ত বিজ্ঞানী জুকোভাৰ সৈতে পৰিচয় হয় ৰূপার্টৰ৷ ৬৭ বছৰীয়া জুকোভা এগৰাকী আণৱিক জীৱ বিজ্ঞানী আৰু মধুমেহ ৰোগ বিশেষজ্ঞ৷ দীর্ঘদিন ধৰি জুকোভা চিকিৎসা গৱেষণা কামৰ সৈতে জড়িত আছিল৷