নিউজ ডেস্ক, ৭ নৱেম্বৰ : টীম ইণ্ডিয়াৰ তাৰকা বেটাৰ বিৰাট কোহলিৰ আইচিচি টেষ্ট ৰেংকিঙত বৃহৎ অৱনমন ঘটিছে৷ শেহতীয়াকৈ প্রকাশ পোৱা আইচিচি টেষ্ট ৰেংকিঙৰ বেটাৰ শাখাৰ প্রথম ২০ৰ পৰা বাহিৰ হয় কোহলি৷ নিউজিলেণ্ডৰ বিৰুদ্ধে সদ্য সমাপ্ত তিনিখনীয়া টেষ্ট মেচৰ শৃংখলাটোত দাঙি ধৰা দুর্বল প্রদর্শনৰ বাবেই ৮টা স্থান পিছুৱাই ২২সংখ্যক স্থানটো লাভ কৰে কোহলিয়ে৷ ইফালে, টীম ইণ্ডিয়াৰ উইকেটকীপাৰ–বেটাৰ ঋষভ পণ্টে পাঁচটা স্থান আগুৱাই ষষ্ঠ স্থানটো অধিকাৰ কৰিছে৷ এটা স্থান পিছুৱাই জয়ছোৱালে চতুর্থ স্থানটো দখল কৰে৷ ইংলেণ্ডৰ জ’ ৰুটে শীর্ষস্থানটো নিজৰ দখলতে ৰাখিছে৷ আনহাতে, দক্ষিণ আফ্রিকাৰ কাগিছো ৰাবাডাই শীর্ষস্থান দখল কৰি থকা বলিং শাখাত দুটা স্থান আগুৱাই ষষ্ঠ স্থানটো অধিকাৰ কৰিছে ভাৰতৰ ৰবীন্দ্র জাদেজাই৷