🔹 বিজয়ী-বিজিত দল, খেলুৱৈক মেডেল-ট্ৰফী প্ৰদান
নিয়মীয়া বাৰ্তা, ২৩ ডিচেম্বৰ : তিতাবৰত ছদিনীয়া কাৰ্যসূচীৰে অনুষ্ঠিত হোৱা খেল মহাৰণৰ অতি উৎসাহজনক পৰিৱেশত আজি সফলতাৰে সামৰণি পৰে। ছদিনীয়া কাৰ্যসূচীত সমষ্টিটোৰ বিভিন্ন প্ৰান্তৰ কেইবাশ খেলুৱৈৰ মাজত বিভিন্ন খেল অনুষ্ঠিত কৰি বাছনি কৰা হয়। অতি ভিতৰুৱা গ্ৰামাঞ্চলৰ পৰা ওলাই আহি পদক জিনিবলৈ সক্ষম হোৱা প্ৰতিভাৱান খেলুৱৈসকলৰ উৎসাহ দেখি আয়োজকসকলো যথেষ্ট আনন্দিত হৈ পৰে। খেল মহাৰণৰ তিতাবৰ সমষ্টি সমিতিৰ সভাপতি পাৰ্থপ্ৰতিম শইকীয়া, যোৰহাট জিলা ক্ৰীড়া বিষয়া ৰাহুল শৰ্মা, সমন্বয়ক নিত্যানন্দ শইকীয়া, তিতাবৰ খণ্ড উন্নয়ন বিষয়া শিখামণি গগৈ আদিৰ লগতে কেইবাগৰাকী গণ্যমান্য ব্যক্তিৰ উপস্থিতিত আজি আবেলি বিজয়ী আৰু বিজিতসকলক মেডেল, ট্ৰফী প্ৰদান কৰা হয়। খেল মহাৰণৰ ছদিনীয়া কাৰ্যসূচীত সহযোগিতা আগবঢ়োৱা সকলোকে সংবাদ মাধ্যমৰ জৰিয়তে কৃতজ্ঞতা জ্ঞাপন কৰে সমষ্টি সমিতিৰ সভাপতি পাৰ্থ প্ৰতিম শইকীয়াই।
প্ৰেৰক অজয় শইকীয়া