নিয়মীয়া বাৰ্তা, ২৭ ফেব্ৰুৱাৰীঃ আজি দিনৰ পোহৰতে ধুবুৰীৰ ব্যস্ত ৰাজপথ এটাৰে গৈ থকা এগৰাকী ব্যক্তিৰ পৰা টকাৰ বেগ থাপ মাৰি পলাবলৈ চেষ্টা কৰাৰ সময়ত ৰাইজে এটা চিলনী চোৰ কৰায়ত্ত কৰি আৰক্ষীক গতাই দিয়া বুলি জানিব পৰা গৈছে। ঘটনাৰ বিৱৰণী মতে, আজি ধুবুৰীস্থ জিলা আৰক্ষী অধীক্ষকৰ কাৰ্যালয়ৰ সমীপৰ ৰাজপথেৰে গৈ থকা অৱস্থাত অকষ্মাতে ব্যক্তি এগৰাকীয়ে নিজৰ গলধনত কিবা জ্বলা যেন পায়। ঠিক সেই সময়তেই এটা চিলনী চোৰে ব্যক্তিগৰাকীৰ ধনৰ বেগ থাপ মাৰি পলাবলৈ চেষ্টা কৰে যদিও প্ৰত্যক্শদৰ্শীয়ে চোৰোকাকৈ দৌৰি দৌৰি গৈ কৰায়ত্ত কৰে আৰু উত্তম-মধ্যম দি আৰক্ষীক গতাই দিয়ে। চিলনী চোৰটোৱে কিবা ব্যক্তিগৰাকীৰ গলধনত ৰাসায়নিক সামগ্ৰী ছটিয়াই চুৰি কৰাৰ পৰিকল্পনা ৰচিছিল বুলি সন্দেহ কৰা হৈছে। উল্লেখ্য যে, চোৰটোৰ জেপৰ পৰা দুটা সৰু সৰু স্ক্ৰু-ড্ৰাইভাৰৰ দৰে চোকা বস্তু পোৱা গৈছে। ধৃত চিলনী চোৰটো বিহাৰৰ কিষানগঞ্জৰ মণ্ডী যাদৱ (৪০) বুলি প্ৰকাশ।
প্ৰেৰক অমিতাভ চক্ৰৱৰ্তী