নিউজ ডেস্ক, ১৩ মাৰ্চঃ এক দেশ, এক নির্বাচনক লৈ সংসদীয় যৌথ কমিটীয়ে অতি শীঘ্রে মুকলি কৰিব ৱেবছাইট৷ দেশৰ নাগৰিকসকলৰ এই বিষয়টো সন্দর্ভত মতামত সংগ্রহৰ লক্ষ্যৰে ৱেবছাইট মুকলি কৰা হ’ব৷ কমিটীৰ বৈঠকত সংসদীয় যৌথ কমিটীৰ সদস্য তথা ৰাজ্যসভাৰ সাংসদ, দেশৰ প্রাক্তন মুখ্য ন্যায়াধীশ ৰঞ্জন গগৈয়ে সংবিধানতে একেলগে নির্বাচন অনুষ্ঠিত কৰাৰ কথা কোৱা হৈছে বুলি উল্লেখ কৰে৷ আনফালে কোনো চৰকাৰ অনাস্থা প্রস্তাৱত সংখ্যালঘু হৈ গ’লেও তেওঁলোকৰ জৰিয়তে চৰকাৰ চলোৱা উচিত বুলিও যুক্তি দর্শায় গগৈয়ে৷ লক্ষণীয়ভাৱে ৰঞ্জন গগৈৰ মতামতৰ বিৰুদ্ধে তৃণমূল কংগ্রেছৰ লোকসভাৰ সাংসদ কল্যাণ বেনার্জীয়ে মন্তব্য আগবঢ়ায়৷ বেনার্জীৰ মতে, এক দেশ, এক নির্বাচন ব্যৱস্থাই দেশৰ যুক্তৰাষ্ট্রীয় গাঁথনিলৈ সংকট কঢ়িয়াই আনিব৷ স্মর্তব্য যে এক দেশ, এক নির্বাচনক লৈ ইতিমধ্যে বিধেয়ক সংসদত দাখিল কৰা হৈছে৷ কিন্তু বিষয়টোক লৈ বিস্তৃত আলোচনাৰ বাবে এই বিধেয়ক সংসদীয় যৌথ কমিটীলৈ প্রেৰণ কৰা হৈছে৷ কমিটীয়ে ইতিমধ্যে এই বিষয়টোক লৈ আলোচনা আৰম্ভ কৰিছে৷ স্মর্তব্য যে প্রাক্তন ৰাষ্ট্রপতি ৰামনাথ কোৱিন্দৰ নেতৃত্বত গঠিত কমিটীয়ে এক দেশ, এক নির্বাচনৰ পক্ষত এক প্রতিবেদন দাখিল কৰিছে৷ সেই প্রতিবেদনৰ ওপৰত ভিত্তি কৰি মোদী চৰকাৰে দেশত একে সময়তে নির্বাচন অনুষ্ঠিত কৰিলে ধনৰ অপচয় হ্রাস পাব বুলি যুক্তি দর্শাইছে৷ কিন্তু বিৰোধী দলসমূহে ইয়াৰ প্রতিবাদ কৰি আহিছে৷ এই বিষয়টোক লৈ সকলো ৰাজনৈতিক দলৰ মতামত গ্রহণৰ প্রয়োজন আছে বুলি সংসদীয় যৌথ কমিটীত কেইবাগৰাকীও সদস্যই দাবী জনাইছে৷ ইয়াৰ পিছতে যৌথ সংসদীয় কমিটীয়ে দেশৰ জনসাধাৰণৰ মতামত গ্রহণৰ বাবে ৱেবছাইট মুকলি কৰাৰ সিদ্ধান্ত লোৱাটো তাৎপর্যপূর্ণ ঘটনা হিচাপে চিহ্ণিত হৈছে৷