নিউজ ডেস্ক, ১৭ মাৰ্চঃ ‘গ্রীন কার্ড’ থাকিলেই আমেৰিকাত স্থায়ীভাৱে অনির্দিষ্টকালৰ বাবে বসবাস নহয় এইবাৰ দেশখনৰ প্রব্রজন নীতিক লৈ মুখ খুলিলে উপ–ৰাষ্ট্রপতি জে ডি ভান্সে৷ শেহতীয়াকৈ আমেৰিকাত ‘গ’ল্ড কার্ড’ প্রচলনক লৈ চিন্তা–চর্চা কৰা বুলি উল্লেখ কৰিছে ৰাষ্ট্রপতি ড’নাল্ড ট্রাম্পে৷ ট্রাম্পৰ কথাৰ আঁত ধৰিয়েই এইবাৰ জে ডি ভান্সে কয় যে ভৱিষ্যতলৈ ‘গ্রীন কার্ড’ থকাসকলে স্থায়ীভাৱে আমেৰিকাত বসবাস কৰিব নোৱাৰিব৷ শেহতীয়াকৈ এক সাক্ষাৎকাৰত উপ–ৰাষ্ট্রপতি ভান্সে উল্লেখ কৰিছে যে এগৰাকী ‘গ্রীন কার্ড’ থকা ব্যক্তিৰ আমেৰিকাত অনির্দিষ্টকালৰ বাবে আমেৰিকাত থকাৰ অধিকাৰ নাই৷ জে ডি ভান্সৰ এই মন্তব্যৰ পিছতে আমেৰিকাত বসবাস কৰি থকা ভাৰতীয় লোকসকল উদ্বিগ্ণ হৈ পৰিছে৷ উল্লেখনীয় যে দ্বিতীয়বাৰ আমেৰিকাৰ ক্ষমতালৈ উভতিয়েই এটাৰ পিছত এটাকৈ কঠোৰ সিদ্ধান্ত গ্রহণ কৰিছে ড’নাল্ড ট্রাম্পে৷ আমেৰিকাৰ পৰা অনুপ্রৱেশকাৰীসকল ইতিমধ্যে নিজ নিজ দেশলৈ বিতাড়নৰ প্রক্রিয়া চলাই থকা হৈছে দেশখনত৷ ইয়াৰ উপৰি কঠোৰ শুল্ক নীতিৰ কথাও ঘোষণা কৰি আছে ট্রাম্প প্রশাসনে৷ অকল সেয়াই নহয়, আমেৰিকাত জন্মগত নাগৰিকত্ব আইন সলনি কৰাৰ বাবে চেষ্টা চলাই আছে ট্রাম্পে৷ ইতিমধ্যে এই বিষয়টোক লৈ আইনী যুঁজ চলাই আছে ট্রাম্পে৷ এই মাজতে ‘গ্রীন কার্ড’ক লৈ ভান্সৰ বক্তব্যই পুনৰ আশংকা কঢ়িয়াই আনিছে আমেৰিকাত বাস কৰি থকা বিভিন্ন দেশৰ নাগৰিকলৈ৷