বৰ্ণালী এছ. ডেকা
কথাৰে নহয় বন্ধু কামত পৰিচয়, জীৱন যুঁজত আছে সদায় জয়-পৰাজয়।” সঁচাকৈ জীৱনত এই কথাষাৰ সাৰোগত কৰি আগবাঢ়ি যোৱা এজনী ছোৱালী। সদায় কিবা এটা বেলেগ কৰাৰ পিছত মানসিকতা পুহি ৰখা এজনী ছোৱালী। নাম উপাসনা দাস। তেজপুৰ বিশ্ববদ্যালয়ৰ পৰা জনসংযোগ বিভাগত সুখ্যাতিৰে স্নাতকোত্তৰ ডিগ্ৰী লাভ কৰাৰ পাছত এটি অতি সহজে মোটা অংকৰ বিনিময়ত চাকৰি এটাত যোগদান কৰিব পাৰিলেহেঁতেন। কিন্তু সেয়া নকৰি তেওঁ নিজাববীয়াকৈ কিবা এটা কাম কৰাৰ সিদ্ধান্ত গ্ৰহণ কৰিলে।
পৰিকল্পনা কৰিলে এখন চাহৰ দোকান দিব। কিন্তু কিছু পৃথককৈ। ভবা মতে কাম। বহু কল্পনাৰ অন্তত তেওঁৰ কলাসুলভ মনটোৱে চাহ বনোৱা কেটলিৰ আৰ্হিত এখন চাহৰ দোকান বনাবলৈ মন মেলিলে। কেটলিৰ আৰ্হিত চাহৰ দোকান! প্ৰথম অৱস্থাত এই আৰ্হিত দোকান বনোৱা কথা ভাবি অলপ বিবুধিত পৰিছিল যদিও পাছলৈ ভবা মতেই এই আৰ্হিত দোকান এখন নিৰ্মাণ কৰা মানুহ যোগাৰ কৰিলে। থলুৱা এজন শিল্পীয়ে নিৰ্মাণ কৰি উলিয়ালে এই কেটলিৰ আৰ্হিৰ দোকানখন।
মুকলি কৰিলে কেটলিৰ আৰ্হিত প্ৰথম চাহৰ দোকান। স্থান কটন বিশ্ববিদ্যালয়ৰ সন্মুখ। নাম দিলে “এপিয়লা”। নামটোৰ লগত সুন্দৰকৈ খাপ খাই পৰিল দোকানখন। দোকানখন চাবলৈ মানুহৰ লানি নিছিগা ভিৰ। কটনৰ সন্মুখত যেন দোকানখন হৈ পৰিল আড্ডাৰ এক নতুন ঠাই। নতুন প্ৰজন্মই আঁকোৱালি ললে স্পেচিয়াল কুৱালিটীৰ চাহৰ লগতে পোৱা অটচ, ব্ৰেড অমলেট, ভিন্ন সোৱাদৰ আইটেমবোৰ।
আজিৰ পৃথিৱীত নাৰীৰ আত্মনিৰ্ভৰশীলতা এতিয়া কেৱল ইচ্ছা নহয়, সেই সময়ৰ দাবী। প্ৰযুক্তি, শিক্ষা, অৰ্থনৈতিক বিকাশৰ এই যুগত নাৰী আৰু পুৰুষৰ সমান অংশগ্ৰহণ অবিহনে এখন সমাজ বা দেশক আগুৱাই নিয়াটো সম্ভৱ নহয়। নাৰীৰ আত্মনিৰ্ভৰশীলতাই কেৱল নিজৰ জীৱন সমৃদ্ধ কৰাই নহয়, তেওঁলোকৰ পৰিয়াল, সমাজ, অৰ্থনীতিৰ ওপৰতো গভীৰ প্ৰভাৱ পেলায়। অৱশ্যে ইয়াক লাভ কৰাৰ পথটোও কম প্ৰত্যাহ্বানজনক নহয়।
এপিয়লা বিপণীখন মুকলি কৰাৰ পাছত বহু প্ৰত্যাহ্বানৰ সন্মুখীন হৈছিল উপাসনাই। দিন ৰাতি কষ্টৰ পাছত এনে কিছুমান সময়ো আহিছিল যে দিনৰ ভাগত দোকানখন সুকলমে চাহ আপ্যায়নৰ পিছত যেতিয়া নিশা দোকান বন্ধ কৰি ঘৰমুৱা হৈছিল পুৱা আহি দোকানখন সেই ঠাইত বিচাৰি পোৱা নাছিল, যিহেতু ভ্ৰাম্যমাণ দোকান গতিকে কিছু অসাধু লোকে দোকানখন মূল ঠাইৰ পৰা আঁতৰাই বেলেগ ঠাইত ৰাখিছিল। বহু দিন এনে দুষ্কৰ্ম কৰাৰ পাছত দুই এদিন গোটেই ৰাতি দোকানখন পহৰা দিয়ো আছিল উপাসনাই। এনে দুৰ্দিনৰ সময়তো কিন্তু তেওঁ নিজৰ মনোবল হেৰুওৱা নাছিল। অটল আছিল। নিজৰ ওপৰত অগাধ বিশ্বাস আছিল। শেষত হাৰ মানিছিল সেই অসাধু লোকবোৰে।
আৰ্থিকভাৱে স্বাধীন হোৱাটো এগৰাকী মহিলাৰ বাবে অতি গুৰুত্বপূৰ্ণ। চাকৰি বা নিজা ব্যৱসায়ৰ জৰিয়তে উপাৰ্জন কৰি মহিলাসকলে নিজৰ লগতে পৰিয়ালৰ প্ৰয়োজনীয়তা পূৰণ কৰিব পাৰে। অৰ্থনৈতিক স্বাধীনতাই মহিলাৰ সবলীকৰণ নিশ্চিত কৰে আৰু যিকোনো কঠিন পৰিস্থিতিত সিদ্ধান্ত লোৱাত সহায় কৰে।
শেহতীয়াকৈ এপিয়লাৰ স্থান সলনি হৈছে। কিছু অসুবিধা তথা উপযুক্ত ঠাইৰ অভাৱত তেওঁ এই দোকানখনৰ প্ৰচলন বন্ধ ৰাখিবলগীয়া হৈছে যদিও নতুনকৈ পুনৰ উদ্যমেৰে আৰম্ভ কৰাৰ প্ৰতিশ্ৰুতি দিছে।
হলেও যেন হাৰ মনা নাই উপাসনাই। ঘৰৰ পৰা ডিজাইনাৰ মমবাতি, জৈৱিক চাবোন, চকলেট নিজে তৈয়াৰ কৰি এখন সুকীয়া পৃথিৱী গঢ়ি তুলিছে। শ্ৰেজা নামেৰে এই ব্ৰেণ্ড মুকলি কৰি অসমৰ বাহিৰলৈ এই উৎপাদন সামগ্রী প্ৰেৰণ কৰি আহিছে।
শেহতীয়াকৈ এই এপিয়ালাৰ ভগ্নী সংস্কৰণ ভোজন ভাইবছ ৰূপে এখন সুন্দৰ ৰেস্তোৰাঁ মুকলি কৰিছে যত সকলো ধৰণৰ ফাষ্ট ফুড উপলব্ধ।
খাৰঘুলিস্থিত বাসগৃহৰ পৰাই আৰম্ভ কৰিছে এখন ৰেষ্টুৰেণ্ট। এক মনোমোহা পৰিৱেশ তথা এক থলুৱা আভাসেৰে এই ৰেস্তোৰাঁখন নিৰ্মাণ কৰা হৈছে। ভিন্ন প্ৰকাৰৰ ফাষ্টফুডৰ সোৱাদ আপুনি ইয়াত লব পাৰিব। অনলাইনযোগেও আপুনি এই খাদ্য অৰ্ডাৰ কৰিব পাৰিব।
সুস্বাদু ব্যঞ্জন তথা স্বাস্থ্য সন্মত বিবিধ খাদ্য গ্ৰহণ কৰিব পাৰিব ইয়াত।
স্বতাধিকাৰী উপাসনা ই নিজাববীয়াকৈ প্ৰত্যাহ্বান লৈছিল যে কোনোধৰণৰ ফ্ৰজেন এইটেম ব্যৱহাৰ নকৰাকৈ সম্পূৰ্ণ সতেজ উপাদান ব্যৱহাৰ কৰি গ্ৰাহকক সুৱাছদু খাদ্য পৰিবেশন কাৰুওৱা।
উপাসনাৰ এই যাত্ৰাত তেওঁক পদে পদে সহযোগিতা আগবঢ়াই আহিছে তেওঁৰ মাতৃ ৰঙিলী দাসে। পখিলা খেদাৰ বয়সতে পিতৃহাৰা হোৱা উপাসনাই জীৱন যুদ্ধৰ এগৰাকী অক্লান্ত সেনানী।
নিজৰ ব্যৱসায় সুকলমে চলাই নিয়াৰ সমান্তৰালকৈ বৰ্তমান এখন ব্যক্তিগত মহাবিদ্যায়ত তেওঁ পাৰ্টটাইম হিচাপে জনসংযোগ বিভাগত শিক্ষয়িত্ৰী ৰূপত কৰ্মৰত।
জীৱনত আৰু কি পৰিকল্পনা আছে বুলি সোধা এক প্ৰশ্নৰ উত্তৰত তেওঁ কয় যে এপিয়লা ব্ৰেণ্ডটোক লৈ বহু কাম কৰাৰ সপোন আছে। আৰু এখন ফাষ্টফুড খোলাৰ পৰিকল্পনা আছে।
আত্মনিৰ্ভৰশীল হোৱাটোৱে এগৰাকী নাৰীৰ আত্মবিশ্বাস বৃদ্ধি কৰে। তেওঁৰ চিন্তাধাৰা, জীৱনশৈলী আৰু কৰ্মৰ প্ৰতি থকা দৃষ্টিভংগী আনতকৈ পৃথক। তেওঁ নিজৰ ক্ষমতাৰ প্ৰতি সচেতন হৈ পৰে আৰু জীৱনৰ যিকোনো ক্ষেত্ৰতে সিদ্ধান্ত ল’ব পাৰে।
এখন সুস্থ-সবল সমাজ গঢ়াৰ ক্ষেত্ৰত নাৰীৰ ভূমিকা গুৰুত্বপূৰ্ণ। নাৰী-পুৰুষৰ মাজত প্ৰতিযোগিতা মনোভাৱ পোষণ কৰাৰ সময় নহয়, সহযোগিতাৰে আগবঢ়াৰ সময়হে। সকলো বাধাৰ প্ৰাচীৰ নেওচি সমাজৰ প্ৰতিগৰাকী নাৰীয়েই হওক সমাজ আৰু জাতিৰ ধৰণীস্বৰূপ।
শিক্ষা, সাহিত্য, অভিনয় আদি ক্ষেত্ৰত আগবাঢ়ি যোৱাৰ দৰে উদ্যমিতা ক্ষেত্ৰখনতো বহু মহিলাই খোজ পেলইছে। আমাৰ অৰ্থনীতিক দিশটো সবল আৰু শক্তিশালী কৰাৰ ক্ষেত্ৰত এয়া নিশ্চয় এক ইতিবাচক বাৰ্তা। প্ৰত্যাহ্বানবোৰ অতিক্রমি অন্য লোককো অনুপ্রাণিত কৰাৰ লগতে জীৱিকাৰ পথ প্ৰদৰ্শন কৰা উপাসনা দাসলৈ থাকিল আমাৰ শুভাকামনা।
ফোনঃ ৯৮৬৪৪-২২৪২৮