নিউজ ডেস্ক, ২১ এপ্ৰিলঃ ৱাংখেড়েত মহেন্দ্র সিং ধোনীৰ নামত আছে দুখন আসন৷ ২০১১ চনৰ বিশ্বকাপত ভাৰতক ছিক্সাৰ কোবাই বিজয় উপহাৰ দিয়া বলটো এই দুখন আসনত পৰিছিল৷ সেই আসন দুখনত কোন বহিব সেই কথা স্থিৰ কৰিছে মুম্বাই ক্রিকেট সন্থাই৷ সন্থাটোৱে তেওঁলোকৰ ১৬ আৰু ১৯ বছৰ অনূর্ধ্ব কিছুসংখ্যক ক্রিকেটাৰক বৃত্তি প্রদান কৰে৷ সেই ক্রিকেটাৰসকলৰ বাবে ধোনীৰ নামাংকিত আসন দুখন সংৰক্ষণ কৰিছে মুম্বাই ক্রিকেট সন্থাই৷ সন্থাৰ সভাপতি আজিংক নায়কে সংবাদ মাধ্যমৰ আগত কয়– ‘ধোনীৰ নামত সংৰক্ষিত আসনকেইখনত মুম্বাইৰ হৈ ১৬ আৰু ১৯ অনূর্ধ্ব দলৰ হৈ বৃত্তি লাভ কৰা খেলুৱৈসকলক বহিবলৈ দিয়া হ’ব৷ অৱশ্যে এই বছৰ এই আসন কেইখনৰ টিকট বিক্রী কৰা নহয়৷ তৰুণ ক্রিকেটাৰসকলে যাতে আগন্তুক সময়ত ডাঙৰ ক্রিকেটাৰ হোৱাৰ অনুপ্রেৰণা লাভ কৰে তাৰ বাবেই তেওঁলোকক এই আসনত বহিবলৈ দিয়া হ’ব৷ উল্লেখ্য যে ৱাংখেড়েত শচীন তেণ্ডুলকাৰ, সুনীল গাভাস্কাৰ আৰু বিজয় মার্ছেণ্টৰ নামত যিদৰে ষ্টেণ্ড আছে সেইদৰে প’লি উমৰিগৰ আৰু ভিনু মানকাদৰ নামত আছে ষ্টেডিয়ামৰ দ্বাৰ৷ ৱাংখেড়েত ৰোহিত শর্মাৰ নামত ষ্টেণ্ড নামকৰণ কৰা হ’ব বুলি জানিবলৈ দিয়ে মুম্বাই ক্রিকেট সন্থাই৷ তদুপৰি, অজিত ৱাডেকাৰ আৰু শাৰদ পাৱাৰৰ নামতো কৰা হ’ব ষ্টেণ্ড৷ প্রাক্তন ক্রিকেটাৰৰ নামত এনেদৰে ভাৰতৰ বিভিন্ন ঠাইত ষ্টেণ্ড নামকৰণ কৰা হৈছে৷ কিন্তু ৱাংখেড়েতে কোনো ক্রিকেটাৰৰ নামত প্রথমবাৰৰ বাবে দর্শকৰ আসনৰ নামকৰণ কৰা হয়৷ ধোনীয়ে কোবোৱা ছিক্সাৰৰ স্মৃতি সজীৱ কৰি ৰখাৰ বাবে এনে সিদ্ধান্ত গ্রহণ কৰা হৈছিল৷ ১৯৯৩ চনত মেলবর্ন ক্রিকেট ষ্টেডিয়ামত এখন চকীত হালধীয়া ৰং কৰা হৈছিল৷ এই চকীখনত ছাইমন অডনেলে কোবোৱা ১২২ মিটাৰ উচ্চতাৰ এটা ছিক্সাৰ পৰিছিলগৈ৷ ভিক্টোৰিয়াৰ হৈ তেওঁ নিউ ছাউথ ৱেলছৰ বিৰুদ্ধে এই ছিক্সাৰ কোবাইছিল৷ ২০১৮ চনত মেলব’নৰ এটিহাড ষ্টেডিয়ামৰ এখন চকীত ব্রেড হজৰ এটি ছিক্সাৰ গৈ পৰাত চকীখনৰ ৰং ৰঙা কৰা হৈছিল৷