ভিক্ষাৰী পাকিস্তানক সহায় কৰি বজাৰত লোকচান চীনা কোম্পানীৰ

ভিক্ষাৰী পাকিস্তানক সহায় কৰি বজাৰত লোকচান চীনা কোম্পানীৰ

নিউজ ডেস্ক, ১৭ মে’ : যোৱা ২২ এপ্ৰিলত জম্মু-কাশ্মীৰৰ পেহেলগামত সংঘটিত সন্ত্ৰাসবাদী আক্ৰমণৰ পিছত ভাৰতে প্ৰতিশোধ লয়। ‘অপাৰেচন সিন্দূৰ’ৰ অধীনত ভাৰতীয় সেনাই পাকিস্তান আৰু পাকিস্তান অধিকৃত কাশ্মীৰৰ ৯টা সন্ত্ৰাসবাদী আত্মগোপন স্থানক লক্ষ্য কৰি লৈ সম্পূৰ্ণৰূপে ধ্বংস কৰে। ইয়াৰ দ্বাৰা হতাশ হৈ পাকিস্তানে তুৰ্কী আৰু চীনে প্ৰদান কৰা অস্ত্ৰ-শস্ত্ৰক ঢাল হিচাপে ব্যৱহাৰ কৰি ভাৰতক আক্ৰমণ কৰিবলৈ চেষ্টা কৰে। কিন্তু ভাৰতৰ প্ৰতিৰক্ষা ব্যৱস্থাই পাকিস্তানে ভাৰত আক্ৰমণৰ বাবে ব্যৱহাৰ কৰা ড্ৰোন আৰু মিছাইল বিফল কৰি পেলালে।

ৰাষ্ট্ৰীয় চেনেলৰ প্ৰতিবেদন অনুসৰি এয়াৰ অপাৰেচনৰ সঞ্চালক প্ৰধান এয়াৰ মাৰ্শ্বাল এ. কে. ভাৰতীয়ে কৈছিল, ভাৰতৰ এয়াৰ ডিফেন্স চিষ্টেম দেৱালৰ দৰে থিয় হৈ আছে। ইয়াক পৃথক কৰাটো পাকিস্তানৰ ক্ষমতাত নাই। তুৰ্কিৰ ড্ৰোন হওক বা আন যিকোনো বস্তু ভাৰতৰ প্ৰযুক্তিৰ সন্মুখত সকলো বিফল। ইয়াৰ ফলস্বৰূপে এতিয়া বিনিয়োগকাৰীৰ মনত ‘মেড ইন চাইনা’ক লৈ প্ৰশ্ন উত্থাপন হৈছে। ফলত চীনৰ প্ৰতিৰক্ষা মজুত তীব্ৰভাৱে হ্ৰাস পাইছে।

চীনৰ শ্বেনজেনত থকা বিমান কোম্পানী এভিক চেংডুৰ শ্বেয়াৰ একেৰাহে তিনিটা ব্যৱসায়িক অধিবেশনত ৯ শতাংশ পৰ্যন্ত বিপুল হ্ৰাস দেখা গৈছে। ভাৰতৰ বিৰুদ্ধে যুদ্ধৰ সময়ত পাকিস্তানে এই কোম্পানীয়ে নিৰ্মিত জে-১০চি যুদ্ধ বিমান ব্যৱহাৰ কৰিছিল। একে ধৰণেৰে পাকিস্তানেও ভাৰতীয় সেনাক লক্ষ্য কৰি পিএল-১৫ এয়াৰ টু এয়াৰ মিছাইল ব্যৱহাৰ কৰিছিল৷ ইয়াক নিৰ্মাণ কৰা কোম্পানী ঝুঝৌ হংডা ইলেক্ট্ৰনিকছ কৰ্পৰ শ্বেয়াৰ ১০ শতাংশ হ্ৰাস পাইছে।

ইয়াৰ উপৰি চীন এৰোস্পেচ টাইমছ ইলেক্ট্ৰনিকছৰ শ্বেয়াৰ দুদিনত ৭ শতাংশ হ্ৰাস পোৱাৰ বিপৰীতে ব্ৰাইট লেজাৰ টেকন’লজিছ, নৰ্থ ইণ্ডাষ্ট্ৰীজ গ্ৰুপ, চাইনা স্পেচছেট আৰু এভিআইচি এয়াৰক্ৰাফ্টৰ শ্বেয়াৰো ৫-১০ শতাংশৰ ভিতৰত হ্ৰাস পাইছে।

ইফালে ভাৰতত প্ৰতিৰক্ষা খণ্ডৰ কোম্পানীসমূহৰ ব্যাপক উত্থান ঘটিছিল। তিনি দিনত ১০ শতাংশ বৃদ্ধি পালে নিফটি ইণ্ডিয়া ডিফেন্স ইনডেক্স। আইডিয়াফৰ্জ, জি আৰ এছ ই, কোচিন শ্বিপয়াৰ্ড, ভাৰত ডাইনেমিক্সৰ দৰে কোম্পানীৰ শ্বেয়াৰ এসপ্তাহৰ ভিতৰতে জঁপিয়াই ৩৮ শতাংশলৈ বৃদ্ধি পায়।