প্রথমবাৰৰ বাবে এখন মেচত ৩টা ছুপাৰ অভাৰ

নিউজ ডেস্ক, ১৮ জুন : এবাৰ বা দুবাৰ নহয়, তিনিবাৰকৈ ছুপাৰ অভাৰ খেলি মেচৰ ফলাফল নির্ণয় কৰা হ’ল৷ নেদাৰলেণ্ডছ আৰু নেপালৰ মাজত অনুষ্ঠিত টি–২০ মেচখন এক ঐতিহাসিক পৰিঘটনাৰ সাক্ষী হৈ ৰ’ল৷

ক্রিকেটৰ ইতিহাসত প্রথমবাৰৰ বাবে এনে এখন মেচ আছিল, যাৰ ফলাফল নির্ণয় কৰা হৈছিল তিনিটা ছুপাৰ অভাৰ খেলাৰ পিছত৷ শ্বাসৰুদ্ধকাৰী মেচখনত অৱশেষত নেদাৰলেণ্ডছে জয়লাভ কৰে৷

নেপাল আৰু নেদাৰলেণ্ডছে গ্লাছগ’ত স্কটলেণ্ডৰ সৈতে ত্রিদেশীয় শৃংখলা খেল আছে৷ গ্লাছগ’ত অনুষ্ঠিত মেচখনত প্রথমে বেটিং কৰি নেদাৰলেণ্ডছে নির্ধাৰিত ২০ অভাৰত ১৫২ ৰান কৰে৷

প্রত্যুত্তৰত নেপালে নির্ধাৰিত অভাৰত ১৫২ ৰান কৰাত মেচখন টাহ হয় আৰু ছুপাৰ অভাৰ প্রয়োগ কৰা হয়৷ ছুপাৰ অভাৰত নেপালে ১৯ ৰান কৰাৰ প্রত্যুত্তৰত নেদাৰলেণ্ডছেও ১৯ ৰানত ইনিংছ সামৰাত মেচখন পুনৰ টাই হয়৷ ফলত দ্বিতীয় ছুপাৰ অভাৰত মেচখন সিদ্ধান্ত লোৱা হয়৷

নেদাৰলেণ্ডে প্রথমে বেটিং কৰি ১৮ ৰান সংগ্রহ কৰে যদিও নেপালেও ১৮ ৰান কৰে৷ ফলত সমগ্র বিশ্বহ ক্রিকেটৰ হতিহাসত প্রথমবাৰৰ বাবে এখন মেচত তিনিটা ছুপাৰ অভাৰৰ সাক্ষী হ’ল৷ প্রথমে বেটিং কৰিবলৈ অহা নেপাল দলটোৰ দুজন বেটাৰে কোনো ৰান নকৰাকৈ বিদায় লয়৷ প্রত্যুত্তৰত মাইকেল লেভিটে প্রথম বলত ছয় কোবোৱাত নেদাৰলেণ্ডে মেচখনত জয়লাভ কৰে৷

মন কৰিবলগীয়া যে ২০১৯ চনৰ বিশ্বকাপৰ পূর্বে নিয়ম আছিল যে যদি ছুপাৰ অভাৰত টাই হয় তেন্তে বাউণ্ডেৰী কাউণ্টৰ জৰিয়তে বিজয়ী ঘোষণা কৰা হ’ব৷ কিন্তু উত্তপ্ত বিতর্কৰ অন্তত সেহ নিয়ম সলনি হ’ল৷ বর্তমানৰ নিয়ম অনুসৰি কোনোবাই বেট–বলৰ যুদ্ধত জয়ী নোহোৱালৈকে বিজয়ী নির্ণয় কৰিব নোৱাৰি৷