কিয় ৭ দিনে ভাৰততে আছে ব্ৰিটিছ যুঁজাৰু বিমান F-35B

নিউজ ডেস্ক, ২১ জুনঃ ব্ৰিটেইনৰ ৰয়েল নেভিৰ এখন অত্যাধুনিক যুঁজাৰু বিমান F-35B বিমান বিগত ৭ দিন ধৰি কেৰালাৰ তিৰুৱনন্তপুৰম আন্তঃৰাষ্ট্ৰীয় বিমানবন্দৰত ৰখাই থোৱা আছে। যোৱা ১৪ জুনৰ নিশা প্ৰায় ৯:৩০ বজাত জেট বিমানখনে জৰুৰীকালীন অৱতৰণ কৰে। প্ৰথম অৱস্থাত ইয়াৰ অৱতৰণৰ কাৰণ ইন্ধনৰ অভাৱ বুলি কোৱা হৈছিল।

এইচ এম এছ প্ৰিন্স অৱ ৱেলছ নামৰ ব্ৰিটিছ বিমানবাহী জাহাজৰ পৰা উৰা মাৰিছিল যুদ্ধ বিমানখন ভাৰতৰ এয়াৰ ডিফেন্স আইডেন্টিফিকেশন জ’ন (ADIZ)ৰ বাহিৰত ৰুটিন ট্ৰেইনিং বিমানত জড়িত আছিল। এই সময়ছোৱাত জেট বিমানখন তিৰুৱনন্তপুৰমলৈ ডাইভাৰ্ট কৰা হয়, যিটো ইতিমধ্যে জৰুৰীকালীন পুনৰুদ্ধাৰ বিমানবন্দৰ হিচাপে চিহ্নিত কৰা হৈছিল।

তাৎক্ষণিক সহায় ভাৰতীয় বায়ুসেনাৰ

ভাৰতীয় বায়ুসেনাৰ বিষয়াসকলে জনোৱা মতে, বিমানখন নিৰাপদে অৱতৰণ কৰাৰ লগতে ততাতৈয়াকৈ ইন্ধন ভৰোৱাকে ধৰি সকলো প্ৰয়োজনীয় সহায়ৰ ব্যৱস্থা কৰা হয়। কিন্তু উৰণৰ পূৰ্বে জেট বিমানখনৰ হাইড্ৰলিক চিষ্টেমত বিজুতি ঘটিছিল, যাৰ বাবে ই পুনৰ উৰিব পৰা নাছিল।

আহিল কাৰিকৰী দল

ব্ৰিটিছ বিমানবাহী জাহাজৰ এটা কাৰিকৰী দল জেটখন মেৰামতিৰ বাবে নিয়োগ কৰা হৈছিল যদিও তেওঁলোকে কাৰিকৰী দোষটো ঠিক কৰাত সফল নহ’ল। এতিয়া ব্ৰিটেইনৰ পৰা কেৰালালৈ এটা বৃহৎ কাৰিকৰী দল প্ৰেৰণৰ প্ৰস্তুতি চলি আছে, যিয়ে বিমানখনৰ প্ৰয়োজনীয় কাৰিকৰী মেৰামতি কৰিব।

সামৰিক মালবাহী বিমানেৰে নিব যুদ্ধ বিমানখন!

যদিহে মেৰামতি স্থানতে সমস্যাৰ সমাধান নহয়, তেন্তে বিষয়াসকলে ইংগিত দিছে যে এই উচ্চ প্ৰযুক্তিৰ যুঁজাৰু বিমানখন সামৰিক মালবাহী বিমানৰ জৰিয়তে ঘূৰাই নিব পাৰি। এই প্ৰক্ৰিয়া বিমানখনৰ অৱস্থা আৰু কাৰিকৰী মূল্যায়নৰ ওপৰত নিৰ্ভৰ কৰিব।

কাৰিকৰী অনুমোদন-সহযোগিতাৰ প্ৰক্ৰিয়া অব্যাহত

থিৰুৱনন্তপুৰম বিমানবন্দৰৰ বিষয়াসকলে ইতিমধ্যে নিশ্চিত কৰিছিল যে বিমানখন অৱতৰণ কৰাৰ পিছৰে পৰা কাৰিকৰী দোষটো অব্যাহত আছে। বৰ্তমান ভাৰতীয় বিষয়াসকলে অতিৰিক্ত ইন্ধন ভৰোৱাৰ বাবে আনুষ্ঠানিক অনুমোদনৰ বাবে অপেক্ষা কৰি আছে, যাতে মেৰামতিৰ কাম সম্পূৰ্ণ হোৱাৰ পিছত বিমানখন উৰণৰ বাবে সাজু কৰিব পৰা যায়।

কৌশলগত-কাৰিকৰী সমন্বয়ৰ ওপৰত প্ৰশ্ন

ভাৰতৰ মাটিত জৰুৰী পৰিস্থিতিত এই উন্নত জেট অৱতৰণ আৰু তাৰ পিছত কাৰিকৰী কাৰণত দীৰ্ঘদিন ধৰি আবদ্ধ হৈ থকাৰ ঘটনাই দুয়োখন দেশৰ মাজত নিৰাপত্তা সহযোগিতা, জৰুৰীকালীন ব্যৱস্থাপনা আৰু সামৰিক সমন্বয়ৰ সৈতে জড়িত বহু গুৰুত্বপূৰ্ণ প্ৰশ্নৰ উত্থাপন কৰিছে। অৱশ্যে এই স্পৰ্শকাতৰ পৰিস্থিতি চম্ভালিবলৈ ভাৰত আৰু ব্ৰিটেইনৰ প্ৰতিৰক্ষা বিষয়াসকলে সক্ৰিয়ভাৱে একেলগে কাম কৰি আছে।