ইংলেণ্ড ভ্ৰমণত শুভমন গিলে ভাৰতীয় অধিনায়ক হিচাপে তেওঁৰ যাত্ৰা আৰম্ভ কৰিছে। এই ছিৰিজে গিলৰ মহান অধিনায়কত্বৰ কেৰিয়াৰৰ ভিত্তি স্থাপন কৰিব পাৰে, কিন্তু এই ছিৰিজে গৌতম গম্ভীৰৰ বাবে অতি ক্ষতিকাৰক প্ৰমাণিত হ’ব পাৰে। প্ৰকৃততে ইংলেণ্ড ক্ৰিকেট দলৰ প্ৰাক্তন অধিনায়ক মাইক এথাৰ্টনৰ মতে, যদি ভাৰত ইংলেণ্ডৰ বিৰুদ্ধে ছিৰিজত পৰাজিত হয়, তেন্তে মুখ্য প্ৰশিক্ষক গৌতম গম্ভীৰ তীব্ৰ চাপৰ মুখামুখি হ’ব। তেওঁ প্ৰশিক্ষক হোৱাৰ পিছত টীম ইণ্ডিয়া ইতিমধ্যে অষ্ট্ৰেলিয়া আৰু নিউজিলেণ্ডৰ হাতত পৰাজিত হৈছে।
স্কাই স্প’ৰ্টছত কৰা মন্তব্যত মাইক এথাৰ্টনে কয়, “ভাৰত ইতিমধ্যে ধাৰাবাহিক দুটা টেষ্ট ছিৰিজত পৰাজিত হৈছে। ঘৰত নিউজিলেণ্ডৰ হাতত ৩-০ আৰু তাৰ পিছত বৰ্ডাৰ-গাভাস্কাৰ ট্ৰফীত ৩-১ৰে পৰাজিত হৈছে। এতিয়া যদি তেওঁলোকে ইংলেণ্ডৰ বিৰুদ্ধে এই ছিৰিজত পৰাজয়ৰ সন্মুখীন হয়, তেন্তে প্ৰশিক্ষক হিচাপে গৌতম গম্ভীৰ চাপৰ মুখামুখি হ’ব।”
এথাৰ্টনে আৰু কয় যে ভাৰতীয় ক্ৰিকেট দলৰ হাতত থকা সম্পদৰ পৰিপ্ৰেক্ষিতত ভাৰতৰ জনসাধাৰণে আশা কৰে যে তেওঁলোকৰ দল যেতিয়া খেলপথাৰত নামে, তেতিয়া জয়ী হৈ উভতি আহিব। ইংলেণ্ডৰ প্ৰাক্তন অধিনায়কে স্বীকাৰ কৰিলে যে ধাৰাবাহিক তিনিটা টেষ্ট ছিৰিজত পৰাজয়ৰ ফলত গৌতম গম্ভীৰৰ সমস্যা নিশ্চিতভাৱে বৃদ্ধি পাব।
ইংলেণ্ডৰ বিৰুদ্ধে বৰ্তমানৰ ছিৰিজৰ পূৰ্বে গৌতম গম্ভীৰৰ প্ৰশিক্ষকত্বৰ অধীনত টীম ইণ্ডিয়াই এতিয়ালৈকে তিনিটা টেষ্ট ছিৰিজ খেলিছে। তাৰ ভিতৰত ভাৰতে কেৱল বাংলাদেশক পৰাজিত কৰিব পাৰিছে। কিন্তু তাৰ পিছত অষ্ট্ৰেলিয়া আৰু নিউজিলেণ্ডে টীম ইণ্ডিয়াক পৰাজিত কৰিছে। ইফালে, এতিয়া ইংলেণ্ডতো ভাৰতীয় দলৰ বাবে ছিৰিজটো সৰ্বাধিক ড্ৰ’ কৰোৱাটো সম্ভৱ হ’ব পাৰে। যদিও গৌতম গম্ভীৰৰ প্ৰশিক্ষকত্বত ভাৰতে হোৱাইট বলত দুৰ্দান্ত প্ৰদৰ্শন কৰিছে। গম্ভীৰৰ প্ৰশিক্ষকত্বত ভাৰতে এতিয়ালৈকে কোনো টি-২০ ছিৰিজত পৰাজিত হোৱা নাই, আৰু এদিনীয়া ফৰ্মেটত চেম্পিয়নছ ট্ৰফী জয় কৰিছে।
Niyomiya Barta Desk, 1 August, 2025