দেশৰ ৰাজধানী নতুন দিল্লীত প্রাক্তন পত্নীক এজন যুৱকে সাধুৰ বেশেৰে আহি ঘৰত প্রৱেশ কৰি হত্যা কৰা ঘটনাই চাঞ্চল্যৰ সৃষ্টি কৰিছে৷ দক্ষিণ দিল্লীত প্রাক্তন পত্নীৰ ঘৰত এজন যুৱকে সাধুৰ বেশেৰে প্রৱেশ কৰি বিভিন্ন বিষয়ক লৈ ঘণ্টাৰ পিছত লৈ ঘণ্টা আলোচনাত মিলিত হয়৷
এই আলোচনাৰ মাজতে যুৱকজনে হাতুৰীৰে কোবাই কোবাই প্রাক্তন পত্নীক হত্যা কৰি পলায়ন কৰে৷ নিশা সংঘটিত ঘটনাটো পুৱাহে ওচৰ–চুবুৰীয়াই জানিব পাৰি আৰক্ষীক খবৰ দিয়ে৷ আৰক্ষীয়ে ঘটনাস্থলীত উপস্থিত হৈ কিৰণ ঝা নামৰ মহিলাগৰাকীৰ ৰক্তাক্ত মৃতদেহ উদ্ধাৰ কৰে৷
আৰক্ষীয়ে প্রকাশ কৰা মতে, অঞ্চলটোৰ চিচি টিভিৰ ফুটেজৰ আধাৰত অভিযুক্তক চিনাক্ত কৰা হৈছে৷ নিশা ১২ বাজি ৫০ মিনিটত মৃত মহিলাগৰাকীৰ বাসভৱনৰ ওচৰে–পাঁজৰে ব্যক্তিজনক সন্দেহজনকভাৱে ঘূৰি ফুৰা দেখা গৈছে৷ এই ব্যক্তিজনকে আৰক্ষীয়ে মহিলাগৰাকীক হত্যা কৰি পলায়ন কৰা বুলি সন্দেহ প্রকাশ কৰিছে৷ উল্লেখ্য যে হত্যাকাণ্ডত জড়িত যুৱকজনক বিহাৰৰ মুংগৰ জিলাৰ বাসিন্দা বুলি আৰক্ষীয়ে চিনাক্ত কৰিবলৈ সক্ষম হৈছে৷
Niyomiya Barta Desk, 8 August, 2025