Gen-Z বিক্ষোভ : নেপালৰ প্ৰধানমন্ত্ৰী কে পি শৰ্মা অলিয়ে আজি নিজৰ পদৰ পৰা পদত্যাগ কৰিছে। সেনাপ্ৰধান জেনেৰেল অশোক ৰাজ সিগদেলে তেওঁক পদত্যাগৰ পৰামৰ্শ দিছিল, এই কাৰণে যে পদত্যাগৰ পিছতহে দেশৰ পৰিস্থিতিৰ উন্নতি হ’ব। নেপালত ছ’চিয়েল মিডিয়া এপৰ ওপৰত নিষেধাজ্ঞাৰ বিৰুদ্ধে জেন-জি প্ৰতিবাদকাৰীসকলে বিক্ষোভ প্ৰদৰ্শন কৰি আছে। প্ৰতিবাদকাৰীসকলে ৰাষ্ট্ৰপতিৰ ঘৰত জুই দিয়াৰ দৰে ঘটনাও ঘটিছিল।
দেশৰ অৱনতিশীল পৰিস্থিতিৰ মাজত ৰাষ্ট্ৰপতি ৰামচন্দ্ৰ পৌড়েলে প্ৰধানমন্ত্ৰীৰ পদত্যাগ পত্ৰ গ্ৰহণ কৰিছে। বৰ্তমান প্ৰধানমন্ত্ৰীগৰাকী সুৰক্ষাৰ কাৰণে নেপালী সেনাৰ সৈতে আছে।
কে পি শৰ্মা অলিয়ে তেওঁৰ পদত্যাগ পত্ৰত লিখিছে, “মাননীয় ৰাষ্ট্ৰপতি মহোদয়, নেপালৰ সংবিধানৰ অনুচ্ছেদ ৭৬(২) অনুসৰি ৩১ আষাড ২০৮১ বি.এছ.ত প্ৰধানমন্ত্ৰী হিচাপে নিযুক্তি লাভৰ পিছত, আৰু দেশত বৰ্তমান বিদ্যমান অসাধাৰণ পৰিস্থিতিৰ কথা বিবেচনা কৰি, মই সংবিধানৰ অনুচ্ছেদ ৭৭(১)(এ) অনুসৰি আজিৰ পৰা প্ৰধানমন্ত্ৰী পদৰ পৰা পদত্যাগ কৰিছো, যাতে সংবিধানৰ নিয়মানুসৰে সমস্যাৰ ৰাজনৈতিক সমাধানৰ দিশত আগবাঢ়িব পাৰো।”
কে পি শৰ্মা অলি প্ৰথমবাৰৰ বাবে ২০১৫ চনত নেপালৰ প্ৰধানমন্ত্ৰী হৈছিল। তেওঁ ২০১৫ চনৰ অক্টোবৰৰ পৰা ২০১৬ চনৰ আগষ্টলৈ এই পদত আছিল। সমৰ্থন হেৰুওৱাৰ কাৰণে তেওঁ পদত্যাগ কৰিবলগীয়া হৈছিল। অলি দ্বিতীয়বাৰৰ বাবে ২০১৮ চনত প্ৰধানমন্ত্ৰী হয়। তেওঁ ২০১৮ চনৰ ফেব্ৰুৱাৰীৰ পৰা ২০২১ চনৰ মে’লৈ প্ৰধানমন্ত্ৰী পদত আছিল। দ্বিতীয়বাৰৰ বাবেও তেওঁ পদত্যাগ কৰিবলগীয়া হয়। এইবাৰ তেওঁ ৩ বছৰ আৰু ৮৮ দিন পদত আছিল। তৃতীয়বাৰৰ বাবে তেওঁ ২০২৪ চনৰ জুলাইৰ পৰা ২০২৫ চনৰ ছেপ্টেম্বৰলৈ প্ৰধানমন্ত্ৰী হিচাপে কাৰ্যনিৰ্বাহ কৰে।
Niyomiya Barta Desk, 9 September