প্রধানমন্ত্রী নৰেন্দ্র মোদীয়ে ভিডিঅ’ কনফাৰেঞ্চৰ জৰিয়তে দেশবাসীক সম্বোধন কৰি দেশজুৰি নতুন জিএছটি বলৱতৰ কথা ঘোষণা কৰে৷ আজিৰ পৰা সমগ্র দেশত নেক্সট জেন জিএছটি বলৱৎ হ’ব৷
এই সন্দর্ভত প্রধানমন্ত্রীয়ে কয় যে নৱৰাত্রিৰ প্রথম দিনাৰ পৰাই দেশে আত্মনির্ভৰ ভাৰতৰ দিশে এখোজ আগুৱাব৷ কাইলৈৰ সূর্যোদয়ৰ পৰাই নতুন জিএছটি সংস্কাৰ ৰূপায়ণেৰে সমগ্র ভাৰততে জিএছটি বছত উৎসৱ আৰম্ভ হ’ব৷
তেওঁ কয় যে সেই উৎসৱে সমাজৰ প্রতিটো শ্রেণীৰ সঞ্চয় বৃদ্ধি কৰাৰ লগতে নিজৰ পছন্দৰ সামগ্রী ক্রয় কৰাত সহায় কৰিব৷ প্রধানমন্ত্রীয়ে বছত উৎসৱৰ সুফল দৰিদ্র, মধ্যবিত্ত শ্রেণী, নব্য মধ্যবিত্ত শ্রেণী, যুৱক–যুৱতী, কৃষক, মহিলা আৰু ব্যৱসায়ী তথা উদ্যোগীসকলে লাভ কৰিব৷ দেশৰ কোটি কোটি পৰিয়ালক নতুন জিএছটি গাঁথনিৰ বাবে শুভেচ্ছা জ্ঞাপন কৰি প্রধানমন্ত্রীয়ে এই সংস্কাৰে ভাৰতৰ বিকাশৰ কাহিনী ত্বৰান্বিত কৰিব বুলি উল্লেখ কৰে৷
তেওঁ লগতে ব্যৱসায়িক কার্যকলাপ, অধিক বিনিয়োগ আকর্ষণ আৰু প্রতিখন ৰাজ্য উন্নয়নৰ দৌৰত সমান অংশীদাৰ হোৱাটো নিশ্চিত কৰিব বুলি কয়৷ ২০১৭ চনত জিএছটি বলৱতৰ কথা সুঁৱৰি প্রধানমন্ত্রীয়ে ইয়াৰ পূর্বে দেশত এক ডজনতকৈও অধিক কৰ গাঁথনিৰ জটিলতাৰ প্রসংগ উত্থাপন কৰে৷ পূর্বৰ কৰ গাঁথনি দেশৰ ভিতৰতে সামগ্রী পৰিবহণত দেখা দিয়া অসুবিধাৰ বিপৰীতে নতুন জিএছটিয়ে সমগ্র দেশতে এক কৰ গাঁথনিৰ সূচনা কৰা বুলি কয়৷
২০১৪ চনত দেশৰ শাসনভাৰ গ্রহণৰ পিছতে তেওঁৰ চৰকাৰে জিএছটি বলৱৎ কৰাটোত অগ্রাধিকাৰ দিছিল৷ বর্তমান চৰকাৰে নতুন কৰ গাঁথনিৰ অধীনত মূলতঃ ৫ আৰু ১৮ শতাংশ কৰহে বলৱৎ থাকিব৷ তদুপৰি বীমা আৰু জীৱনদায়িনী ঔষধকে ধৰি কেতবোৰ সামগ্রীৰ জিএছটি সম্পূর্ণ ৰেহাই দিয়া বুলিও সদৰী কৰে প্রধানমন্ত্রীয়ে৷
নিয়মীয়া বাৰ্তা ডেস্ক, ২২ ছেপ্টেম্বৰ