আজি মহাসপ্তমী
ঢাক নহয়, এইবাৰ মায়াৱিনীৰে মুখৰ হৈছে ৰাজ্যৰ দুর্গা পূজাথলীসমূহ
আমন্ত্রণ–বোধন–অধিবাসেৰে ষষ্ঠীৰ বেদীত প্রতিষ্ঠা দেৱী
নির্মল আকাশত শুকুলা মেঘৰ মাদল বজাই–মনত ময়ূৰৰ নাচোন তুলি আকৌ আহিছে ঋতুৰাণী শৰৎ৷ সদ্যস্নাতা ‘শাৰদী’ক আদৰিবলৈ আত্মবিভোৰ প্রকৃতি৷ প্রাণৰ শিল্পীক চিৰদিনলৈ হেৰুওৱাৰ কাল–ধুমুহাজাকে থানবান কৰি যোৱা অসমীয়াৰ পৰিশ্রান্ত মন–মগজু কিছু হ’লেও যেন প্রগলভা৷
ঠিক অমৃতকণ্ঠই কৈ যোৱাৰ দৰে– শৰৎ মোৰ অনিদ্রা/কেতিয়াবা জড়তা/কেতিয়াবা নিঃস্বতা/কিন্তু তাৰ মাজতো যেতিয়া শৰৎ আহে/মই কথা কওঁ…গান গাওঁ, কবিতা হওঁ…/কেৱল তোমাৰ দুচকুৰ বাবে…৷৷ হয়, শৰৎ মানেই দুর্গতিনাশিনী দেৱী দুর্গাৰ অকালবোধন৷ মোহনীয় শাৰদ সন্ধ্যাৰ ষষ্ঠীৰ বেদীত মহিষমর্দিনীৰ আমন্ত্রণ–বোধন–অধিবাস৷
চৌপাশে দেৱসুৰৰ মন্ত্রোধ্বনি– ওম মহিষাগ্ণি মহামায়া চামুণ্ডে মুণ্ডমালিনী, আয়ুৰ আৰোগ্য বিজয়ং দেহি দেৱী নমস্তুতে, ওম হ্রীং দুর্গায়ে নমঃ…৷
প্রিয় শিল্পীক হেৰুওৱাৰ বেদনাৰ মাজতো সংগোপনে আহিছে শৰৎ৷ লৈ আহিছে শাৰদীয় দুর্গোৎসৱৰ বতৰা৷ অৱশ্যে অইনবাৰৰ দৰে এইবাৰ শাৰদীয় বতৰ উছাহপূর্ণ নহয়৷ অসমীয়াৰ আৱেগ জুবিন গার্গৰ আদ্যশ্রাদ্ধৰ মাজতেই শাৰদীয় উৎসৱ আৰম্ভ হৈছে৷
ষষ্ঠীৰ বেদীত দেৱী দশভুজাৰ প্রাণ প্রতিষ্ঠাৰ লগে লগে শাৰদীয় দুর্গোৎসৱৰ আৰম্ভণি ঘটিল৷ দেৱীৰ কল্পাৰম্ভ, বেলবৰণ, আমন্ত্রণ আৰু অধিবাসৰ মাজেৰে বেদীত প্রতিষ্ঠা হ’ল দেৱী দুর্গাক৷ দৈৱগ্যৰ মতে, এইবাৰ হাতীত আগমন হৈছে দেৱী দুর্গাৰ৷ ফল, শস্য–শ্যামলা পৃথিৱী৷
মোহময়ী শাৰদ সনধ্যা দেৱীৰ আমন্ত্রণ–বোধন–ধি সম্পন্ন হোৱাৰ পাছতে ষষ্ঠীৰ যথাবিহিত পূজা–অর্চনা আগবঢ়োৱা হয়৷ মহাসপ্তমীত দৈৱজ্ঞৰ মতে, পুৱাৰ পৰা কাইলৈ দেৱী দুর্গাৰ নৱপত্রিকা প্রৱেশ আৰু স্থাপনৰ পাছতেই পুৱা ১০ বজাৰ পৰা আৰম্ভ হ’ব যথাবিহিত দুর্গাপূজা৷
ৰাজ্যৰ প্রান্তে প্রান্তে আয়োজন কৰা দুর্গাপূজাসমূহৰ উপৰি স্থায়ী শক্তিপীঠসমূহতো ব্যাপক আয়োজনেৰে মহাসপ্তমীৰ শক্তিৰূপী দেৱী দুর্গাৰ পূজা–অর্চনা অনুষ্ঠিত হ’ব৷ ঠাইবিশেষে বিভিন্ন দেৱালয়ত ধর্মীয় পৰম্পৰা ৰক্ষা কৰি বলি–বিধানেৰে দেৱীক আৰাধনা কৰা হ’ব৷
সপ্তমী আৰু অষ্টমীৰ লগতে নৱমীৰ দিনাও ছাগলী, পাৰ, কোমোৰা, কুঁহিয়াৰ, ম’হ আদি বলিৰে দেৱী দুর্গাক ৰাইজে পূজা আগবঢ়াব৷ দিনৰ দুই বজাত সপ্তমী পূজাৰ সামৰণি ঘটিব৷ শাৰদীয় দুর্গোৎসৱে প্রতিবাৰেই ৰাজ্যজুৰি ৰাইজৰ মনলৈ কঢ়িয়াই আনে আনন্দৰ বতৰা৷ কিন্তু এইবাৰ যেন শাৰদীয় দুর্গোৎসৱ পূর্বৰ তুলনাত কিছু পৃথক হ’ব৷
কিয়নো প্রিয় শিল্পীৰ মৃত্যুৱে শাৰদীয় বতৰৰ সকলো উছাহক ম্লান পেলালে৷ জুবিনবিহীন অসমত আজি শাৰদীয় বতৰৰো কোনো অস্তিত্ব নাই৷ বহু পূজা সমিতিয়ে এইবাৰ বিভিন্ন সাংস্কৃতিক অনুষ্ঠানৰ আয়োজন কৰিছিল৷ কিন্তু প্রিয় শিল্পীগৰাকীৰ অকাল বিয়োগৰ বাবে বহু সমিতিয়ে উক্ত অনুষ্ঠানসমূহ বাতিল কৰি কেৱল বৈদিক ৰীতি–নীতিহে পালন কৰিব বুলি সদৰী কৰিছে৷
সেয়েহে কেৱল ধর্মীয় ৰীতি–নীতি পালনৰ বাবে ৰাইজে দেৱীৰ চৰণত মূৰ দোৱাব৷ জুবিনবিহীন অসমৰ প্রথমটো শাৰদীয় বতৰত এইবাৰ ঢ়াক নহয়, মায়াৱিনীৰে মুখৰ হৈছে ৰাজ্যৰ দুর্গাপূজাথলীসমূহ৷ বহু পূজা সমিতিয়ে আনবাৰৰ দৰে আকর্ষণীয় ৰূপত পূজা মণ্ডপ গঢ়ি তুলিছিল৷ প্রিয় শিল্পীৰ মৃত্যুৰ পাছতে বাহ্যিক আকর্ষণ বাতিল কৰি কেৱল শিল্পীগৰাকীক সন্মান জনোৱাৰ বাবেই বহু নতুন কার্যসূচী হাতত লৈছে৷
সাধাৰণতে ঢাকৰ মূর্চনাই দুর্গাপূজাত এক নতুনত্ব আনে৷ কিন্তু জাতিটোৰ আৱেগক হেৰুৱাই অসমীয়াই আজি হৈ পৰিছে স্তব্ধ৷ সেইবাবেই ঢ়াক তথা দেৱীৰ আৱাহনী মন্ত্রৰ বিপৰীতে প্রিয় শিল্পীৰ ‘মায়াৱিনী ৰাতিৰ বুকুত দেখা পালোঁ তোমাৰ ছবি…’ গীতেৰে মুখৰ হৈছে ৰাজ্যৰ প্রতিখন পূজাথলী৷ দেৱী দুর্গাৰ মৃণ্ময় মূর্তিৰ লগতে প্রিয় শিল্পীৰ প্রতিচ্ছবি পূজা মণ্ডপত সশ্রদ্ধভাৱে স্থাপন কৰি ৰাইজে শ্রদ্ধা জনাই দেৱী দুর্গাক আবেদন জনাইছে মহান শিল্পীগৰাকীৰ আত্মাই যাতে সৰগত স্থান লাভ কৰে৷
ধৰালৈ পুনৰ মৰমৰ জুবিন গার্গ হৈ তেওঁ উভতি আহক– এয়াই শাৰদীয় বতৰত ৰাইজে মনে–প্রাণে কামনা কৰিছে৷ ক’বলৈ গ’লে আজিৰ তাৰিখত শোকত ম্রিয়মাণ অসমীয়াৰ বাবে শাৰদীয় দুর্গোৎসৱ মাথোঁ বৈদিক ৰীতি–নীতিৰে দায়িত্ব পালনৰ এক উৎসৱহে হৈ পৰিছে৷ আঁৰত মাথোঁ আছে প্রাণৰ শিল্পীগৰাকীক অকালতে হেৰুওৱাৰ অব্যক্ত বেদনা৷ এনেদৰেই এইবাৰ শাৰদীয় দুর্গোৎসৱত মহিষমর্দিনী শক্তিৰূপী দেৱী দুর্গাক ৰাইজে আৱাহন জনাব যে প্রিয় শিল্পীগৰাকীৰ সৈতে হোৱা অন্যায়ৰ সুবিচাৰ হওক৷ মৰমৰ শিল্পীগৰাকীৰ বিদেহ আত্মাই চিৰশান্তি লাভ কৰক৷
নিয়মীয়া বাৰ্তা ডেস্ক, ২৯ ছেপ্টেম্বৰ