ফোনত মোক কোৱা হৈছিল এইটো ভাৰতীয় দল… ক্রিছ ব্রডৰ চাঞ্চল্যকৰ অভিযোগ

ভাৰতীয় ক্রিকেট নিয়ন্ত্রণ ব’ৰ্ডৰ বিৰুদ্ধে গুৰুতৰ অভিযোগ উত্থাপন কৰিছে মেচ ৰেফাৰী ক্রিছ ব্রডে৷ ২১ বছৰ ধৰি মেচ ৰেফাৰী হিচাপে কাম কৰি আহিছে ব্রডে৷ ১২৩খন টেষ্ট, ৩৬১খন এদিনীয়া আৰু ১৩৮খন টি–২০ মেচত আম্পায়াৰৰ দায়িত্ব বহন কৰা ব্রডে অভিযোগ কৰে যে ভাৰতীয় দলটোৱে মন্থৰ গতিত বলিং কৰিলেও তেওঁক শাস্তি দিয়াত নিষেধাজ্ঞা আৰোপ কৰা হৈছে৷

ইংলেণ্ডৰ প্রাক্তন তাৰকা পেচ বলাৰ ষ্টুৱার্ট ব্রডৰ পিতৃৰ এই অভিযোগে ক্রিকেট জগতত আলোড়নৰ সৃষ্টি কৰিছে৷ শেহতীয়াকৈ দিয়া এটা সাক্ষাৎকাৰত ব্রডে কয়– ‘ভাৰতীয় দলটোৱে এখন মেচত নির্ধাৰিত সময়ত ৩–৪ অভাৰ কম বলিং কৰিছিল৷

লেহেমীয়া বলিঙৰ বাবে ভাৰতীয় দলটোক শাস্তি দিয়া উচিত আছিল৷ ঠিক তেতিয়াই ফোন আহিল৷ তেওঁলোকক ক্ষমাশীল হ’বলৈ কোৱা হ’ল৷ তেওঁলোকক ভাৰতীয় দলটোক শাস্তি দিয়াত নিষেধাজ্ঞা আৰোপ কৰা হ’ল৷ কাৰণ, দলটোৰ নাম হ’ল ভাৰত৷

গতিকে, বিষয়টোক বেলেগ ধৰণে চাবলৈ বাধ্য হ’লোঁ৷’ ব্রডে লগতে কয়– ‘এই ঘটনা ইয়াতেই শেষ হোৱা নাছিল৷ পৰৱর্তী মেচখনতো একেই কথা হৈছিল৷ তাৰ পিছতো মোক শাস্তি নিদিবলৈ কোৱা হৈছিল৷ ৰাজনীতি জড়িত আছিল৷ হয়তো ভাৰতীয় ব’ৰ্ড শক্তিশালী হোৱাৰ বাবেই তেওঁলোকে বিচাৰে বাকীসকলে মূৰ দোঁৱাই পুতলাৰ দৰে কাম কৰিব৷

২১ বছৰীয়া দীঘলীয়া কেৰিয়াৰত মাজে মাজে ৰাজনীতিৰ সৈতে মোকাবিলা কৰিবলগীয়া হৈছিল৷’ ব্রডে আকৌ কয় যে ভৱিষ্যতেও মেচ ৰেফাৰীৰ দায়িত্ব চম্ভালিব বিচাৰিছিল৷ কিন্তু যোৱা বছৰ আইচিচিয়ে তেওঁৰ চুক্তি বৃদ্ধি কৰা নাছিল৷

ডিজিটেল ডেস্ক, ২৯ অক্টোবৰ