নিয়মীয়া বাৰ্তা, ৩১ মাৰ্চঃ প্ৰধানমন্ত্ৰী নৰেন্দ্ৰ মোডীয়ে ক’ৰোনা ভাইৰাছ মহামাৰীৰ বাবে যোৱা ২৪ মাৰ্চত ২১ দিনীয়া দেশজোৰা লকডাউন ঘোষণা কৰাত হাজাৰ হাজাৰ লোক সমস্যাৰ সন্মুখীন হৈছে । কৰ্ণাটকৰ বেংগালুৰুত ৰাজমিস্ত্ৰী হিচাপে জীৱন নিৰ্বাহ কৰি থকা ৰাজস্থানৰ এজন ব্যক্তিয়ে লকডাউনৰ সময়ত ২,০০০ কিলোমিটাৰ পথ অতিক্ৰম কৰি চাৰিখন ৰাজ্যৰ মাজেৰে নিজ গৃহলৈ যাব লগাৰ দৰে পৰিস্থিতিৰ সৃষ্টি হৈছে । হঠাতে ৰেল আৰু পথ পৰিবহণ বন্ধ হৈ পৰাৰ বাবে বহু লোকে দেশৰ বিভিন্ন স্থানৰ পৰা দিনে-নিশাই খোজকাঢ়ি নিজ গৃহলৈ যাত্ৰা কৰিবলগীয়া হৈছে ।
বেংগালুৰুত কৰ্মৰত ৰাজমিস্ত্ৰী বিজা ৰাম আৰু তেওঁৰ সংগী বানৱাৰিয়ে ২৪ মাৰ্চত লকডাউন ঘোষণা কৰাৰ পাচতেই কৰ্ণাটকৰ পৰা মহাৰাষ্ট্ৰ, গুজৰাট আৰু ৰাজস্থানৰ মাজেৰে নিজ গৃহ যোধপুৰলৈ যাত্ৰা আৰম্ভ কৰিছিল । বেংগালুৰু-মুম্বাই হাইৱে চাৰিদিনত অতিক্ৰম কৰাৰ পাচত সোমবাৰে পুৱা দুয়োজন ব্যক্তি মুম্বাইত উপস্থিত হয়হি । মুম্বাইৰ পৰা তেওঁলোকে পুনৰ মুম্বাই-আহমেদাবাদ হাইৱেযোগে খোজকাঢ়ি ৰাজস্থানলৈ যাত্ৰা আৰম্ভ কৰিছে । লকডাউন ঘোষণা কৰাৰ পাচতেই প্ৰতিখন ৰাজ্যৰ সীমান্ত আৰু জিলাৰ সীমা ছীল কৰি দিয়াৰ পাচত বিজা ৰাম আৰু বানৱাৰিক বহু ঠাইত আৰক্ষীয়ে হকা-বাধা দিছিল । কিন্তু পেচাত কাঠমিস্ত্ৰীবিজা ৰামে কয় – বেংগালুৰুৰ পৰা যাত্ৰা কৰিবলৈ মোৰ আৰু আন পথ নাই । খাদ্য ক্ৰয় কৰিবলৈ মোৰ হাতত টকা নাই আৰু পৰিয়ালৰ লোকসকল মোক লৈ অত্যন্ত চিন্তিত ।
উল্লেখ্য যে, এই দুয়োজন ব্যক্তিৰ ভৰিত নাই এযোৰ চেণ্ডেল তেওঁলোকৰ ভৰিৰ পতা খোজাকাঢ়োতে ফাটি তেজ ওলাইছে । তথাপি ঘৰমুখী যাত্ৰা অব্যাহত ৰাখিছে । এই যাত্ৰাত ৫০ কিলোমিটাৰ খোজকঢ়াৰ পাচতহে সামান্য জিৰণি লয় লোক দুজনে ।