আজি আইপিএলত দিল্লী বনাম বেংগালুৰুৰ এক ৰোমাঞ্চকৰ মেচ অনুষ্ঠিত হ’ব। দুয়োটা দলে অৰুণ জেটলি ষ্টেডিয়ামত মুখামুখি হ’ব। এই ছিজনত দুয়োটা দলৰ মাজত এইখন দ্বিতীয় মোকাবিলা। ইয়াৰ পূৰ্বে দিল্লীয়ে বেংগালুৰুত অনুষ্ঠিত মেচখনত জয়লাভ কৰিছিল। সেয়েহে এইবাৰ বেংগালুৰুৱে প্ৰতিশোধ লোৱাৰ লক্ষ্যৰে খেলপথাৰত নামিব।
পইণ্টছ টেবুল অনুসৰি বেংগালুৰু বৰ্তমানে দ্বিতীয় স্থানত আছে। পাটিদাৰৰ নেতৃত্বত দলটোৱে এতিয়ালৈ সাতখন মেচৰ ভিতৰত পাঁচখনত জয়লাভ কৰিছে। আনহাতে দিল্লী সাত নম্বৰ স্থানত আছে আৰু সাতখন মেচৰ ভিতৰত মাত্ৰ তিনিখনত জয়লাভ কৰিছে। পূৰ্বৰ মেচত নিজ গৃহত পঞ্জাবৰ বিৰুদ্ধে ২৬৪ ৰান ৰক্ষা কৰিব নোৱাৰি পৰাজয় স্বীকাৰ কৰিছিল দিল্লীয়ে। আনহাতে বেংগালুৰুয়ে পূৰ্বৰ মেচখনত জয়লাভ কৰিছিল।
অৰুণ জেটলি ষ্টেডিয়ামৰ পিটচ সাধাৰণতে বেটছমেনসকলৰ বাবে সহায়ক বুলি জনা যায়। ইয়াত সাধাৰণতে অধিক ৰান হোৱা দেখা যায়। পূৰ্বতে পঞ্জাব আৰু দিল্লীৰ মাজত অনুষ্ঠিত মেচখনত ৫০০তকৈ অধিক ৰান হৈছিল আৰু পঞ্জাবে ২৬৫ ৰানৰ লক্ষ্য সফলতাৰে অনুসৰণ কৰিছিল। এইবাৰো এক উচ্চ-স্কোৰিং মেচ দেখিবলৈ পোৱাৰ সম্ভাৱনা আছে।
বিশ্লেষণ অনুসৰি এই মেচত বেংগালুৰুৰ জয়ৰ সম্ভাৱনা অলপ অধিক বুলি ধাৰণা কৰা হৈছে। সন্ধিয়াৰ মেচ হোৱাৰ বাবে টছ গুৰুত্বপূৰ্ণ হ’ব পাৰে। টছ জিকা দলটোৱে প্ৰথমে বলিং কৰাৰ সিদ্ধান্ত ল’ব পাৰে বুলি অনুমান কৰা হৈছে।
ডিজিটেল ডেস্ক, ২৭ এপ্ৰিল