কাশীত প্ৰধানমন্ত্ৰী নৰেন্দ্ৰ মোদীয়ে বুধবাৰে কাশী বিশ্বনাথ মন্দিৰত উপস্থিত হৈ বাবা বিশ্বনাথৰ দৰ্শন কৰে। তেওঁ মন্দিৰৰ গৰ্ভগৃহত প্ৰায় ২০ মিনিট সময় ধৰি পূজা-অৰ্চনা কৰে। পাঁচজন পণ্ডিতে তেওঁক পূজা কৰাই মালা পিন্ধাই আৰু ত্ৰিপুণ্ড লগাই আশীৰ্বাদ জনায়। মন্দিৰৰ পৰা ওলাই অহাৰ পিছত বিজেপি নেতাসকলে তেওঁক ত্ৰিশূল আৰু ডম্বৰু উপহাৰ প্ৰদান কৰে। তাৰ পিছত প্ৰধানমন্ত্ৰীয়ে ত্ৰিশূল তুলি জনসাধাৰণক অভিবাদন জনায়।
জানিব পৰা মতে, প্ৰধানমন্ত্ৰীয়ে ১৪ কিলোমিটাৰ দীঘল এক ৰোড শ্ব’ কৰি কাশী বিশ্বনাথ মন্দিৰত উপস্থিত হৈছিল। মন্দিৰৰ প্ৰৱেশদ্বাৰত ১০৮জন বটুকে শংখনাদেৰে তেওঁক উষ্ম আদৰণি জনায়। মন্দিৰত উপস্থিত থাকোঁতে তেওঁ শিশুসকলৰ সৈতে সাক্ষাৎ কৰি কথোপকথনো কৰে।
ইয়াৰ পূৰ্বে ৰোড শ্ব’ চলাকালীন সময়ত বিজেপি কৰ্মীসকলক ঢোল-নাগাৰাৰ তালত নৃত্য কৰা দেখা যায়। বিভিন্ন স্থানত প্ৰধানমন্ত্ৰীৰ ওপৰত ফুল ছটিওৱা হয় আৰু তেওঁ হাত জোকাৰি জনসাধাৰণৰ অভিবাদন গ্ৰহণ কৰে।
উল্লেখযোগ্য যে প্ৰধানমন্ত্ৰীৰ বাবে এইটো বিগত ১১ বছৰত কাশীলৈ ৫৪তম ভ্ৰমণ। ২০২৬ বৰ্ষত এইটো তেওঁৰ প্ৰথম কাশী ভ্ৰমণ, ইয়াৰ পূৰ্বে তেওঁ ২০২৫ চনৰ নৱেম্বৰ মাহত ইয়ালৈ আহিছিল।
ডিজিটেল ডেস্ক, ২৯ এপ্ৰিল