পশ্চিমবংগত বিজেপিয়ে ঐতিহাসিক জয় লাভ কৰি ২৯৪ সদস্যৰ বিধানসভাত ২০৬ আসন দখল কৰাৰ পিছত নতুন চৰকাৰ গঠনৰ প্ৰস্তুতি জোৰদাৰ হৈছে। বিজেপিৰ ৰাজ্যিক সভাপতি সামিক ভট্টাচাৰ্যই জানিবলৈ দিয়ে যে নতুন চৰকাৰখন অহা ৯ মে’ত শপত গ্ৰহণ কৰিব।
২০১১ চনৰ নিৰ্বাচনত বামপন্থী শাসনৰ অৱসান ঘটাই তৃণমূল কংগ্ৰেছ (টিএমচি) তিনিটা কাৰ্যকাল ক্ষমতাত আছিল। কিন্তু এইবাৰ বিজেপিৰ বৃহৎ জয়ত ৰাজ্যখনত ক্ষমতাৰ পৰিৱর্তন ঘটিছে।
যদিও শপত গ্ৰহণৰ তাৰিখ ঘোষণা কৰা হৈছে, এতিয়াও নতুন মুখ্যমন্ত্ৰীৰ নাম আনুষ্ঠানিকভাৱে ঘোষণা কৰা হোৱা নাই। সংবাদমাধ্যমৰ তথ্য অনুসৰি, মুখ্যমন্ত্ৰীৰ নাম চূড়ান্ত কৰা হ’ব নৰেন্দ্ৰ মোদী, অমিত শ্বাহ আৰু বিজেপিৰ ৰাষ্ট্ৰীয় সভাপতিৰ সৈতে বৈঠকৰ পাছত।
মুখ্যমন্ত্ৰী পদৰ সম্ভাব্য দাবীদাৰ
- শুভেন্দু অধিকাৰী: পূৰ্বে মমতা বেনাৰ্জীৰ ঘনিষ্ঠ সহযোগী আছিল যদিও এতিয়া তেওঁকেই তীব্ৰ ৰাজনৈতিক প্ৰতিদ্বন্দ্বী হিচাপে দেখা যায়। নন্দীগ্রাম সমষ্টিত নিজৰ আসন ৰক্ষা কৰাৰ লগতে তেওঁ মমতাক পৰাস্ত কৰি শক্তিশালী দাবীদাৰ হিচাপে আগবাঢ়িছে।
- দিলীপ ঘোষ: অভিজ্ঞ নেতা হিচাপে পৰিচিত দিলীপ ঘোষো মুখ্যমন্ত্ৰী পদৰ বাবে অন্যতম সম্ভাব্য প্ৰাৰ্থী। তেওঁ খড়গপুৰ সদৰ সমষ্টিত জয় লাভ কৰিছে।
- অগ্নিমিত্রা পাল: পূৰ্বে ফেশ্বন ডিজাইনাৰ হিচাপে কৰ্মজীৱন আৰম্ভ কৰা অগ্নিমিত্রা পালে বিজেপিৰ মহিলা মৰ্চাৰ নেতৃত্বও দিছিল। দলটোৱে যদি মহিলা মুখ্যমন্ত্ৰী নিযুক্তি দিয়াৰ সিদ্ধান্ত লয়, তেন্তে তেৱোঁ শক্তিশালী দাবীদাৰ।
- সামিক ভট্টাচাৰ্য: বৰ্তমান ৰাজ্যিক সভাপতি আৰু ৰাজ্যসভাৰ সাংসদ হিচাপে দায়িত্ব পালন কৰি থকা ভট্টাচাৰ্যকো সম্ভাব্য মুখ্যমন্ত্ৰী হিচাপে বিবেচনা কৰা হৈছে।
দলীয় শীৰ্ষ নেতৃত্বই চূড়ান্ত সিদ্ধান্ত লোৱাৰ পিছত নতুন মুখ্যমন্ত্ৰীক বিজেপিৰ বিধায়িনী দলৰ নেতা হিচাপে নিৰ্বাচিত কৰা হ’ব আৰু তাৰ পিছত ৰাজ্যপালৰ ওচৰত চৰকাৰ গঠনৰ দাবী জনোৱা হ’ব।
পশ্চিমবংগত প্ৰথমবাৰৰ বাবে চৰকাৰ গঠন কৰিবলৈ আগবাঢ়ি থকা বিজেপিয়ে এক বৃহৎ কৌশলগত পদক্ষেপ গ্ৰহণ কৰিছে। দলটোৱে ৰাজ্যখনৰ দায়িত্ব কেন্দ্ৰীয় গৃহ মন্ত্ৰী অমিত শ্বাহৰ হাতত অৰ্পণ কৰিছে। এই সিদ্ধান্তৰ ফলত মুখ্যমন্ত্ৰী নিৰ্বাচন আৰু চৰকাৰ গঠনৰ সমগ্ৰ প্ৰক্ৰিয়াটো তেওঁৰ তত্ত্বাৱধানত আগবঢ়াব বুলি ধাৰণা কৰা হৈছে।
ডিজিটেল ডেস্ক, ৫ মে’