বিশ্ব স্বাস্থ্য সংস্থালৈ আমেৰিকাৰ সাহায্য পুঁজি বন্ধ

নিয়মীয়া বাৰ্তা, ১৬ এপ্রিলঃ ভাবুকি দিয়া অনুসৰিয়েই বিশ্ব স্বাস্থ্য সংস্থা (হু)লৈ সাহায্য বন্ধ কৰিছে আমেৰিকান ৰাষ্ট্রপতি ড’নাল্ড ট্রাম্পে ৷ ক’ৰোনা ভাইৰাছ মহামাৰী প্রতিৰোধ কৰাৰ ক্ষেত্রত হু ব্যর্থ হোৱা বুলি অভিযোগ কৰাৰ উপৰি ৰাষ্ট্রসংঘৰ সংস্থাটো চীনৰ পক্ষপাতী হৈ পৰা বুলিও ঘোষণা কৰিছিল ট্রাম্পে ৷ চীনৰ পৰা মাৰাত্মক ভাইৰাছবিধৰ বিশ্বজুৰি বিস্তাৰ ঘটাৰ ক্ষেত্রত হুৱে নিজৰ দায়িত্ব পালন কৰিবলৈ সক্ষম হোৱা নাই বুলিও ট্রাম্পে ঘোষণা কৰিছে ৷ আমেৰিকাই বিশ্ব স্বাস্থ্য সংস্থালৈ এই সাহায্য পুঁজি বন্ধ কৰাৰ লগে লগে পৃথিৱীজুৰি সৃষ্টি হৈছে প্রতিক্রিয়া ৷ লক্ষণীয়ভাৱে ৰাষ্ট্রসংঘৰ সচিবপ্রধান এণ্টনিঅ’ গুটেৰেছে ট্রাম্পক এই সিদ্ধান্ত প্রত্যাহাৰ কৰিবলৈ অনুৰোধ জনোৱাৰ উপৰি এই মহাদুর্যোগৰ সময়ত বিশ্ব স্বাস্থ্য সংস্থালৈ পুঁজি কর্তন কৰাটো উচিত নহয় বুলি যুক্তি দর্শাইছে৷ লক্ষণীয়ভাৱে আমেৰিকাত ক’ৰোনা প্রতিৰোধৰ ক্ষেত্রত সঠিক ব্যৱস্থা গ্রহণ কৰিবলৈ সক্ষম হোৱা নাই ট্রাম্প৷ ইয়াৰ বাবে গৃহভূমিত কঠোৰ সমালোচনাৰ সন্মুখীন হৈছে ৰাষ্ট্রপতিগৰাকী৷ ট্রাম্পৰ মতে বিশ্ব স্বাস্থ্য সংস্থাই চীনৰ পৰা মাৰাত্মক ভাইৰাছবিধৰ সংক্রমণ ঘটাৰ পাছতো ইয়াৰ প্রতিৰোধৰ ক্ষেত্রত দ্রুত পদক্ষেপ গ্রহণ কৰাত ব্যর্থ হৈছে৷ চীনৰ প্রতি সংস্থাটোৰ পক্ষপাতিত্ব থকাৰ বাবেই সমগ্র বিশ্ব এতিয়া মহামাৰীৰ সন্মুখীন হোৱা বুলিও ট্রাম্পে ঘোষণা কৰিছে৷ স্মর্তব্য যে বিশ্ব স্বাস্থ্য সংস্থালৈ আমেৰিকাই ২০১৯ বর্ষটোত ৪০০ নিযুত ডলাৰতকৈ অধিক ধন আগবঢ়াইছিল৷ পৃথিৱীৰ ভিতৰতে বিশ্ব স্বাস্থ্য সংস্থালৈ বৃহৎ ধনৰাশি সাহায্য পুঁজি আগবঢ়োৱা দেশ হিচাপে চিহ্ণিত হৈছে আমেৰিকা৷ শেহতীয়াকৈ সংস্থাটোৰ বিৰুদ্ধে এই কঠোৰ ব্যৱস্থা গ্রহণ কৰি ৰাষ্ট্রপতি ট্রাম্পে উল্লেখ কৰিছে যে ৬০ দিনৰ পৰা ৯০ দিন পর্যন্ত বিশ্ব স্বাস্থ্য সংস্থাই আমেৰিকাৰ পৰা কোনো ধৰণৰ সাহায্য পুঁজি নাপাব পাৰে৷ অর্থাৎ এই মহাদুর্যোগৰ সময়ত ট্রাম্পে সৃষ্টি কৰিছে নতুন এক প্রত্যাহ্বান ৷