নিয়মীয়া বাৰ্তা, ২৪ এপ্রিলঃ ন’ভেল ক’ৰোনা ভাইৰাছৰ ভেকচিনৰ বাবে সমগ্র বিশ্বই অতি উৎসুকতাৰে অপেক্ষা কৰি থকাৰ সময়তে ব্রিটেইনত বৃহস্পতিবাৰে প্রথমবাৰৰ বাবে মানৱ দেহত ক’ভিড–১৯ ভেকচিনৰ প্রয়োগ আৰম্ভ কৰা হৈছে ৷ ব্রিটেইনৰ অক্সফ’ৰ্ড বিশ্ববিদ্যালয়ে প্রস্তুত কৰি উলিওৱা এই ভেকচিনৰ সফলতাৰ সম্ভাৱনা ৮০ শতাংশই বুলি দাবী কৰিছে চিকিৎসা বিজ্ঞানীসকলে ৷ ‘ChAdOx1 nCoV-19’ নামৰ এই ক’ৰোনা ভাইৰাছ ভেকচিন পৰীক্ষণ প্রক্রিয়াৰ বাবে ব্রিটেইনৰ চৰকাৰে ২০ নিযুত পাউণ্ড মোকলাই দিছিল ৷ দেশখনৰ স্বাস্থ্য মন্ত্রালয়ৰ সচিব মেট হেনককে জনোৱা মতে, অত্যন্ত প্রয়োজনীয় এই ভেকচিন আৱিষ্কাৰৰ বাবে চৰকাৰে সর্বশক্তি প্রয়োগ কৰিব৷ উল্লেখ্য যে চিম্পাঞ্জীৰ ভাইৰাছৰ পৰা প্রস্তুত কৰা এই ভেকচিনৰ মানৱ পৰীক্ষণৰ বাবে ১৮ বছৰৰ পৰা ৫৫ বছৰৰ স্বাস্থ্যৱান ব্যক্তি স্বেচ্ছাই আগবাঢ়ি আহিছে ৷ যোৱা জানুৱাৰী মাহৰ পৰাই অধ্যাপক ছাৰাহ গিলবার্টৰ নেতৃত্বত অক্সফ’ড ভেকচিন প্রজেক্টত বহুকেইজন বিজ্ঞানীয়ে ক’ৰোনা ভাইৰাছ ভেকচিন আৱিষ্কাৰৰ বাবে কাম অব্যাহত ৰাখিছে ৷