নিয়মীয়া বার্তা, ১১ মেঃ মহামাৰী ক’ৰোনাৰ উৎপত্তিস্থল চীনত সংক্রমণ প্রায় নাইকিয়া হৈছিল যদিও কালি ২৪ ঘণ্টাত দেশখনত নতুনকৈ ১৪জন লোক আক্রান্ত হোৱাত আতংকৰ সৃষ্টি হৈছে৷ চীনৰ নেচনেল হেলথ কমিছনে জনোৱা তথ্য অনুসৰি যোৱা ২৪ এপ্রিলৰ পাছত এয়া সর্বাধিক সংক্রমণৰ ঘটনা৷ ক’ৰোনা ভাইৰাছৰ উৎপত্তিস্থল য়ুহানত পুনৰ এজন লোক সংক্রমণ হোৱাত দেশখনত যে ক’ৰোনাৰ ভয়াৱহতা শেষ হোৱা নাই সেয়া প্রমাণ হ’ল৷ উল্লেখ্য যে য়ুহান চহৰত ৩ এপ্রিলৰ পাছত পুনৰ প্রথমটো সংক্রমণৰ ঘটনা সংঘটিত হ’ল৷ উল্লেখ্য যে চীনত শেহতীয়া তথ্য অনুসৰি ৮২,৯০১জন লোক ক’ৰোনাত সংক্রমিত হৈছিল আৰু ইয়াৰে ৭৮,১২০জন লোক আৰোগ্য হৈছিল৷ আনহাতে, দেশখনত এতিয়ালৈকে ৪,৬৩৩জন লোকৰ মৃত্যু হৈছে৷ চীনৰ পৰাই পৃথিৱীৰ বিভিন্ন স্থানলৈ দ্রুতগতিত বিয়পি পৰে এই মাৰাত্মক ভাইৰাছ৷