নিয়মীয়া বার্তা, ১১ মেঃ মহামাৰী ক’ৰোনা ভাইৰাছে বিশ্বজুৰি হাহাকাৰ অৱস্থাৰ সৃষ্টি কৰি অহাৰ মাজতে ভাৰত আৰু আমেৰিকাই যৌথভাৱে তিনিটাকৈ ক’ভিড–১৯ ভেকচিন সৃষ্টিৰ বাবে গৱেষণা অব্যাহত ৰাখিছে৷ যোৱা তিনি মাহ ধৰি ভাৰত আৰু আমেৰিকাৰ ঔষধ সংস্থাসমূহে এই প্রচেষ্টা অব্যাহত ৰাখিছে৷ আমেৰিকাস্থিত ভাৰতৰ ৰাষ্ট্রদূত তৰণজিৎ সিং সান্ধুৱে এই মন্তব্য কৰিছে৷ তেওঁ ৱাশ্বিংটনক দিল্লীৰ বিশ্বাসযোগ্য সহযোগী আখ্যা দি কয় যে দুয়োখন দেশৰ আইচিএমইআৰ, চিডিচিপি আৰু এনআইএইচ–এ বহু বছৰ ধৰি একেলগে কাম কৰি আহিছে৷ তথ্য আদান–প্রদানৰ ক্ষেত্রতো দুয়োখন দেশে অত্যন্ত সহযোগিতাৰে কাম কৰি আহিছে৷ সান্ধুৱে আৰু কয় যে কমেও তিনিটাকৈ ক’ৰোনা ভাইৰাছৰ ভেকচিনৰ ক্ষেত্রত ভাৰতীয় কোম্পানী আৰু মার্কিন কোম্পানীয়ে একেলগে গৱেষণা অব্যাহত ৰাখিছে৷ উল্লেখ্য যে ক’ৰোনাত আক্রান্ত আমেৰিকাৰ বাবে ভাৰতে বৃহৎ পৰিমাণৰ ঔষধো প্রেৰণ কৰিছে৷