নিয়মীয়া বাৰ্তা, ২৫ মেঃ মাৰাত্মক ক’ভিড–১৯ বা ক’ৰোনা ভাইৰাছ মহামাৰীত প্রায় এক লাখ লোকে দেশত প্রাণ দিয়াৰ পাছতো আমেৰিকাৰ ৰাষ্ট্রপতি ড’নাল্ড ট্রাম্পৰ ব্যক্তিগত দৈনন্দিন কাম–কাজৰ ৰুটিন সলনি হোৱা নাই৷ প্রাণঘাতী ক’ভিড–১৯ৰ মোকাবিলা কৰাৰ ক্ষেত্রত ইতিমধ্যে ব্যর্থ হোৱা বুলি ট্রাম্পৰ বিৰুদ্ধে উত্থাপন হৈছে গুৰুতৰ অভিযোগ৷ দেশৰ চিকিৎসা বিজ্ঞানীসকলৰ এই অভিযোগৰ মাজতে কালি ৰাষ্ট্রপতি ট্রাম্পক গ’ল্ফ খেলি থকা দেখিবলৈ পোৱা গ’ল৷ দেশৰ এই জটিল সন্ধিক্ষণত ৰাষ্ট্রপতিগৰাকীয়ে কেনেদৰে গ’ল্ফ ক্লাবত অৱসৰ বিনোদন কটাবলৈ সুযোগ পালে তাক লৈ সৰৱ চর্চা চলিছে সংবাদ মাধ্যমত৷ স্মর্তব্য যে ক’ভিড–১৯ৰ সংক্রমণ প্রতিৰোধৰ বাবে মার্চ মাহত আমেৰিকাত ৰাষ্ট্রীয় জৰুৰী অৱস্থা ঘোষণা কৰা হৈছিল৷ মার্চৰ পাছত প্রথমবাৰলৈ হোৱাইট হাউছৰ পৰা ৰাষ্ট্রপতিগৰাকীয়ে ট্রাম্প নেচনেল গ’ল্ফ ক্লাবত কালি উপস্থিত হোৱা পৰিলক্ষিত হয়৷ লগে লগে ট্রাম্পৰ বিৰুদ্ধে সৰৱ হৈ উঠিছে সংবাদ মাধ্যম৷ স্মর্তব্য যে যোৱা ৮ মার্চত ফ্ল’ৰিডাৰ ৱেষ্ট পাল্ম বীচ্চত থকা গ’ল্ফ ক্লাবত উপস্থিত হৈছিল ট্রাম্প৷ ইয়াৰ পাছৰে পৰা অৱশ্যে নেতাগৰাকীয়ে বিগত দুটা মাহত গ’ল্ফ ক্লাবৰ পৰা আঁতৰি আছিল৷