মূৰত কঠাল পৰি ভৰ্তি হ’ল হাস্পতালত, ৰিপ’ৰ্ট আহিল ক’ৰোনা পজিটিভ

নিয়মীয়া বাৰ্তা, ২৫ মেঃ কেৰালাৰ কান্নোৰৰ কাচৰগোডত ক’ৰোনা সংক্ৰমণৰ এক আচৰিত ধৰণৰ ঘটনা পোহৰলৈ আহিছে । য’ত এজন লোকৰ মূৰত কঠাল পৰি যোৱাৰ বাবে আঘাতপ্ৰাপ্ত হয় । আৰু তেওঁক পাছত হাস্পতালত ভৰ্তি কৰোৱা হয় । কিন্তু হাস্পতালত তেওঁৰ বিভিন্ন পৰীক্ষা- নিৰীক্ষাৰ অন্তত ক’ভিড-১৯ পজিটিভ পোৱা যায় ।

তথ্য অনুসৰি, লোকজনে গছৰ পৰা কঠাল পৰাৰ চেষ্টা কৰিছিল । কিন্তু সেই সময়তে এটা কঠাল লোকজনৰ শিৰত আহি পৰাত অচেতন হৈ পৰে । লগতে এই দুৰ্ঘটনাত লোকজনৰ ৰাজহাড়ত আঘাত পায় । পাছলৈ লোকজনৰ ৰাজহাড়ৰ অস্ত্ৰোপ্ৰচাৰৰ বাবে হাস্পতালত ভৰ্তি কৰোৱা হয় ।

কিন্তু হাস্পতালত বিভিন্ন ধৰণৰ পৰীক্ষা-নিৰীক্ষাৰ লগতে ক’ভিড-১৯ ৰো টেষ্ট কৰোৱাত লোকজনৰ দেহত ক’ভিড-১৯ পজিটিভ বুলি ৰিপ’ৰ্টত ধৰা পৰে ।

ইপিনে হাস্পতাল কৰ্তৃপক্ষই জনোৱা মতে, লোকজনক তেওঁলোকৰ হাস্পতালত ভৰ্তি কৰোৱাৰ পাছৰে পৰা ক’ৰোনা ভাইৰাছৰ লক্ষণ দেখা পোৱা গৈছিল । লগতে আক্ৰান্ত লোকজনৰ কোনো ট্ৰেভেল হিষ্ট্ৰী নথকাৰ লগতে তেওঁ কোনো ক’ৰোনাত আক্ৰান্ত লোকৰ সংস্পৰ্শলৈও অহা নাছিল ।

উল্লেখ্য যে, কেৰালাৰ কান্নোৰৰ কাচৰগোড নিবাসী এই লোকজন পেচাত এগৰাকী অ’টো চালক । ইয়াৰ পৰা অনুমান কৰিব পাৰি যে, তেওঁ দৈনিক অ’টো চলোৱাৰ সময়তে কোনো আক্ৰান্ত লোকৰ সংস্পৰ্শলৈ আহিছিল ! লগতে তেওঁ যেতিয়া অস্ত্ৰোপ্ৰচাৰৰ বাবে জিলা হাস্পতালত ভৰ্তি হৈছিল, তেতিয়াও কোনো আক্ৰান্ত লোকৰ সংস্পৰ্শলৈ আহিব পাৰে ! অৱশ্যে এই কথা স্পষ্টকৈ প্ৰকাশ কৰিব নোৱাৰি বুলি জিলা হাস্পতালখনৰ কৰ্তৃপক্ষই সংবাদ মাধ্যমক জনায় ।

আনহাতে, লোকজনৰ শৰীৰত ক’ভিড-১৯ পজিটিভ পোৱাৰ পাছতে বৰ্তমান লোকজনৰ পৰিয়ালৰ আন লোকসকলকো কোৱাৰেণ্টাইনত ৰখা হৈছে ।