নিয়মীয়া বাৰ্তা, ২৮ মেঃ দেশৰ ১২৭খন শিক্ষানুষ্ঠান সন্দর্ভত এক গুৰুত্বপূর্ণ নির্দেশনা জাৰি কৰিছে বিশ্ববিদ্যালয় অনুদান আয়োগে৷ এই নির্দেশনা অনুসৰি ভাৰতৰ ১২৭খনকৈ উচ্চ শিক্ষাৰ প্রতিষ্ঠানে এতিয়াৰে পৰা ‘বিশ্ববিদ্যালয়’ হিচাপে পৰিচয় দিব নোৱাৰিব৷ এই শিক্ষানুষ্ঠানসমূহৰ পৰিচয় হ’ব ‘ডীমড্ টু বি ইউনিভার্ছিটী’ হিচাপেহে৷ গুৰুত্বপূর্ণ কথাটো হ’ল অসমৰ এখন শিক্ষানুষ্ঠানৰ ক্ষেত্রতো ইউ জি চিৰ এই নির্দেশনা প্রযোজ্য হ’ব৷ কোকৰাঝাৰ জিলাৰ বালাগাঁৱত থকা ‘চেণ্টেল ইনষ্টিটিউট অৱ টেকন’লজী’ নামৰ শিক্ষানুষ্ঠানখনে বিশ্ববিদ্যালয় অনুদান আয়োগৰ পৰা ২০১৮ চনৰ ডিচেম্বৰ মাহত ‘ডীমড্ ইউনিভার্ছিটী’ৰ মর্যাদা লাভ কৰিছিল৷ কিন্তু শিক্ষানুষ্ঠানখনৰ বিষয়ে বিভিন্ন মাধ্যমত ‘বিশ্ববিদ্যালয়’ হিচাপেহে পৰিচয় দাঙি ধৰা হয়৷ কেৱল কোকৰাঝাৰেই নহয়, দেশৰ আন শতাধিক নামজ্বলা প্রতিষ্ঠানেও ‘ডীমড ইউনিভার্ছিটী’ৰ মর্যাদা লাভ কৰাৰ পাছতে পূর্ণাংগ ইউনিভার্ছিটী হিচাপে চিনাকি দিবলৈ আৰম্ভ কৰে৷ ইয়াৰ ভিতৰত কেৰালাৰ ইণ্ডিয়ান ইনষ্টিটিউট অৱ স্পেচ ছায়েন্স এণ্ড টেকন’লজী, কর্ণাটকৰ ইণ্ডিয়ান ইনষ্টিটিউট অৱ ছায়েন্স, দিল্লীৰ ইণ্ডিয়ান এগ্রিকালচাৰ ৰিছার্চ ইনষ্টিটিউট আদিও আছে৷ অৰুণাচল প্রদেশত থকা নর্থ–ইষ্টার্ন ৰিজি’নেল ইনষ্টিটিউট অৱ ছায়েন্স এণ্ড টেকন’লজীয়েও বিশ্ববিদ্যালয় হিচাপে পৰিচয় দিয়াৰ তথ্য বিশ্ববিদ্যালয় অনুদান আয়োগৰ দৃষ্টিগোচৰ হয়৷ তাৰ পাছতে আজি বিশ্ববিদ্যালয় অনুদান আয়োগে জাৰি কৰা এক গুৰুত্বপূর্ণ নির্দেশনাত কয় যে বিভিন্ন ডীমড্ ইউনিভার্ছিটীৰ মর্যাদাপ্রাপ্ত শিক্ষানুষ্ঠানে ‘বিশ্ববিদ্যালয়’ হিচাপে পৰিচয় দিয়াটো ইউ জি চিৰ দৃষ্টিগোচৰ হৈছে৷ যিটো ইউ জি চি আইনৰ ২৩নং ধাৰাৰ বিৰোধী৷ গতিকে আজিৰ পৰা এমাহৰ ভিতৰত এই শিক্ষানুষ্ঠানসমূহে নিজৰ নামৰ পৰা ‘বিশ্ববিদ্যালয়’ শব্দটো আঁতৰাব লাগিব৷ অন্যথা আইন অনুসৰি বিহিত ব্যৱস্থা গ্রহণ কৰা হ’ব৷