নিয়মীয়া বাৰ্তা ১৬ জুনঃ বহিঃৰাজ্যত আবদ্ধ হৈ থকা লোকসকল উভতি অহাৰ লগে ৰাজ্যজুৰি মাৰাত্মক ক’ৰোনা ভাইৰাছত আক্রান্ত হোৱা লোকৰ সংখ্যা বৃদ্ধি পাইছে৷ বাছ, ৰে’ল আৰু বিমানৰ চলাচল আৰম্ভ হোৱাৰ লগে বহিঃৰাজ্যত দীর্ঘদিনে বন্দী হৈ থকা লোকসকলৰ সোঁত বৈছে ৰাজ্যলৈ৷ এই প্রত্যাহ্বানৰ এতিয়াও অন্ত পৰা নাই৷ বিশেষকৈ ৰে’লযোগে বৃহৎসংখ্যক লোকৰ আগমন ঘটিছে ৰাজ্যলৈ৷ সোমবাৰে ৭খন বিশেষ ৰে’লযোগে কেৰালা আৰু কর্ণাটকৰ পৰা অসমলৈ উভতি আহিছে প্রায় ১১ হাজাৰ লোক৷ ইয়াৰে ৫খন ৰে’ল আহিছে কেৰালাৰ পৰা৷ আন দুখন ৰে’লত কর্ণাটকৰ পৰা আহিছে আবদ্ধ হৈ থকা লোকসকল৷ প্রতিখন ৰে’লতে ১৩০০ৰ পৰা ১৪০০ লোকৰ আগমন ঘটিছে৷ অসম ৰাজ্যিক পৰিবহণ নিগমৰ পৰিচালন সঞ্চালক আনন্দ প্রকাশ তিৱাৰীয়ে সংবাদ মাধ্যমৰ আগত সদৰী কৰা অনুসৰি, কেৰালাৰ পৰা আজি আহিছে প্রায় ৮ হাজাৰ লোক৷ আনহাতে, কর্ণাটকৰ পৰ আহিছে প্রায় ৩ হাজাৰ লোক৷ ইয়াৰ উপৰি আজি দিল্লী আৰু মুম্বাইৰ পৰাও ৩খন ৰে’লযোগে আহিছে বহুসংখ্যক লোক৷ অৱশ্যে দিল্লী আৰু মুম্বাইৰ পৰা এই ৰে’ল তিনিখন নিয়মীয়াভাৱে চলাচল কৰি আছে৷ এই তিনিখন ৰে’লতো প্রায় ২১০০ লোক আজি আহি উপস্থিত হৈছে ৰাজ্যত৷ এই লোকসকলক সংশ্লিষ্ট প্রশাসনৰ তৰফৰ পৰা কোৱাৰেণ্টাইনৰ ব্যৱস্থা কৰা হৈছে৷
উল্লেখ্য যে কেৰালা আৰু কর্ণাটকৰ পৰা আন কেইবাখনো বিশেষ শ্রমিক ৰে’লযোগে অসমলৈ প্রায় ২৫ হাজাৰ লোকৰ আগমন ঘটিব৷ ইয়াৰ লগে লগে ৰাজ্যত ক’ৰোনাত আক্রান্ত হোৱা লোকৰ সংখ্যা দ্রুতগতিত বৃদ্ধি পাব বুলি আশংকা কৰা হৈছে৷ কিয়নো ইয়াৰ পূর্বেও অসমলৈ ৰে’ল, বাছ আৰু বিমানযোগে অহা লোকসকলৰ মাজৰ পৰা বহু লোক ক’ৰোনাত আক্রান্ত হৈছে৷ সেয়েহে কেৰালা আৰু কর্ণাটকৰ পৰা আহিবলগীয়া এই বৃহৎসংখ্যক লোকৰ পৰাও আন ডাঙৰ প্ৰত্যাহ্বান সৃষ্টি হোৱাটো একপ্ৰকাৰ নিশ্চিত হৈ পৰিছে।