নিয়মীয়া বাৰ্তা,২৫ নৱেম্বৰঃ সাৰদা কাণ্ডৰ সৈতে নাম সাঙুৰ খাই পৰা কলকাতাৰ প্ৰাক্তন আৰক্ষী আয়ুক্ত ৰাজীৱ কুমাৰৰ জামিন বাতিলৰ আবেদন স্থগিত কৰিছে উচ্চতম ন্যায়ালয়ে । উচ্চতম ন্যায়ালয়ৰ পৰা জনোৱা অনুসৰি ২৯ নৱেম্বৰ পৰ্যন্ত বাতিল কৰা হৈছে এই শুনানি ।
সাৰদাকাণ্ডৰে জড়িত ৰাজীৱ কুমাৰৰ জামিন বাতিলৰ আবেদনৰ বিষয়ে উচ্চতম ন্যায়ালয়ৰ দ্বাৰস্থ হৈছিল চিবিআই । কলকাতা উচ্চ ন্যায়ালয়ৰ পৰা জামিন লাভ কৰা ৰাজীৱ কুমাৰক চিবিআইয়ে গ্ৰেপ্তাৰ কৰিব নোৱাৰিব বুলিও আদালতে জানিবলৈ দিছিল । ৰাজীৱ কুমাৰক জেৰা কৰাৰ পূৰ্বে ৪৮ ঘণ্টাৰ আগতেই জাননী প্ৰেৰণ কৰিব লাগিব বুলিও আদালতে জনোৱাৰ পাচতেই কলকাতা উচ্চ ন্যায়ালয়ৰ এই ৰায়ক প্ৰত্যাহ্বান জনায় উচ্চতম ন্যায়ালয়ৰ দ্বাৰস্থ হৈছিল চিবি আই ।
ৰাজীৱ কুমাৰক চিবিআইয়ে নিজৰ জিম্মাত ল’বলৈ দীৰ্ঘদিন পৰা চেষ্টা চলাই থকাৰ পাচতো আদালতৰ ৰায়ে যেন বিমুখ কৰিছে চিবিআইক । শেহতীয়াভাৱে সোমবাৰেও চিবিআইয়ে দাখিল কৰা আবেদনৰ ভিত্তিত হোৱা শুনানি অনিৰ্দিষ্টকাললৈ স্থগিত ৰাখে উচ্চতম ন্যায়ালয়ে ।