নিয়মীয়া বাৰ্তা, ১২ ছেপ্টেম্বৰঃ শিৱসেনাৰ প্রাক্তন মুৰব্বী বালাচাহেব থাকৰেই দলটো এদিন কংগ্রেছত পৰিণত হ’ব বুলি আশংকা কৰিছিল৷ শেহতীয়াকৈ অভিনেত্রী কংগনা ৰানাৱটে এই মন্তব্য কৰিছে৷ বালাচাহেব থাকৰেৰ এক পুৰণি সাক্ষাৎকাৰৰ ভিডিঅ’ ছ’চিয়েল মিডিয়া টুইটাৰযোগে মুকলি কৰি দি কংগনাই আক্ষেপ প্রকাশ কৰিছে যে প্রয়াত নেতাগৰাকী আজি থকা হ’লে দলটোৰ কার্যক লৈ ব্যথিত হ’লহেঁতেন৷
স্মর্তব্য যে সাক্ষাৎকাৰটোত থাকৰেই কেতিয়াও নির্বাচন বা দলৰ অভ্যন্তৰত মতানৈক্য বিচৰা নাছিল বুলি স্পষ্ট কৰি দিছিল৷ সাক্ষাৎকাৰটোৰ কিয়দংশ মুকলি কৰি দি কংগনাই উল্লেখ কৰিছে যে থাকৰেৰ ডাঙৰ ভয় আছিল যে এদিন শিৱসেনা কংগ্রেছত পৰিণত হ’ব পাৰে৷
লক্ষণীয়ভাৱে কংগনা ৰানাৱটে নিজৰ প্রিয় নেতাসকলৰ ভিতৰত বালাচাহেব থাকৰেও অন্যতম বুলি অভিহিত কৰিছে৷ সাক্ষাৎকাৰটোত থাকৰেই এসময়ত শিৱসেনাই জোঁটবন্ধনৰ জৰিয়তে কংগ্রেছৰ মিত্র হৈ পৰিব পাৰে বুলি আশংকা কৰিছিল৷